Buhari-i Boko Haram telok samatsütsü asoshi ita 3 agütsür

Abuja, August 14 (Agencies): Nigeria aser kidangsüa aliba linüktem nung lendong kanga sashia atalokdaktsüba Boko Haram telok taruba ita 3 tashi nung meshimeshia samatsütsü ozüng ka Nigeria Tir, Muhammadu Buhari-i yashi Brehostibar nü agütsüogo.

Nigeria mitkar lenir tasen 4 tashi nem lenisütsü menden abentsü tenangzükba agütsüdang Buhari-i iba ozüngji agütsü.

Nigeria Islamic yimli kümdaktsütsü asoshi apusoba Boko Haram telok madak takok ngua raratsü nükjidong nung Buhari-i taküm May ita 29 nü Tir menden benokba sülen Nigeria mitkar kübok tentetba army, navy, air force aser defense staff lenisang nunger lenisütsü menden nungi anendakja liasü.

Aji oda, yashi tenangzükba agir rong nung Chief of Defense Staff, Major-General Abayomi Gabriel Olonisakin; Chief of Army Staff, Major-General T.Y. Buratai, Chief of Naval Staff, Rear Admiral Ibok-Ete Ekwe Ibas aser Chief of Air Staff, Air Vice-Marshal Sadique Abubakar nunger den külemi, Chief of Defence Intelligence, Air Vice Marshal Monday Riku Morgan aser National Security Adviser, retired Major-General Babagana Monguno nunger densemba osang jangjaogo.

Buhari-i Nigeria Tir menden benokba sülena Boko Haram teloki Nigeria nung lendong balala atalokdakja ishiba agi nisung 1000 shi tepsetba osang bushiteta lir.

Buhari-i mitkar lenir tasentem nem Boko Haram telok meshimeshia samatsütsü ozüng agütsüba den külemi, par linük nung tongpang osettsüset bener rakzükraktemba aser tashiyim agi tai maketba nübur pua bener aoba maparen anentsütsü tetuyuba ka yashi agüja liasü.

“Nenoki külemi lungjemer amalitepa inyakba ajanga Boko Haram telok densema asen linük nung lendong tsüdong atalokdaktsüba kiralongrar aser telungpurtem ajunga taruba ita 3 tashi nung meshimeshia samatsütsüla,” ta pai metetdaktsü.

Taoba küm 6 tsüngda nung Boko Haram telok menokdangtettba yong Nigeria nüburtem densema, alimai taoba Nigeria Tir, Goodluck Jonathan aser pai aniba sorkar aija liasü.

Tawa Islamic State (IS) ta ajaba kiralongrar telok tetsüti den sentakteptsü lemtetba osang sangoktsüba Boko Haram teloki Nigeria sorkar anemtsü tenzüker tanü tashi nung Nigeria nunger 10,000 dak tema tepseta lendong atalokdaktsüba osanga bushiteta lir.

Ano külen, Nigeria den külemi lungjemer kidangsüa aliba Chad, Cameroon, Niger aser Benin nungeri tentetba mitkar züngsem 8000 shi densemba teloktep mitkartemi Boko Haram telok madak takok ngua raratsü sentong renemba osanga bushitetogo.