Bujumbura yimti yimdong nung tasümang 21 shi angu

Burundi yimtiba, Bujumbura kübok Nyakabiga kiyong nung tasümang 21 shi tanü Honibar nü anguba sülen tebur ishikati tanü anguba tasümang ka ajunger aoba noksa nung angur. (Bujumbura, December 12) 

Bujumbura, December 12 (Agencies): Burundi yimtiba, Bujumbura yimdong nung tasümang 21 shi tanü Honibar nü shia aruba osang ka sorkar ketdangsertemi metetdaktsüogo.
Mejangjatetba tongpang nung amshitsü prangpong abenertemi Bujumbura nung tentetba mitkar tesep 3 tashi yashi amakba sülen tanü injang agi kasetba tasümangtemji yimti yimdong nung angu ta parnoki ashi.
Ajisüaka, tan Bujumbura kübok Nyakabiga kiyong nung anguba tasümangtemji shirnoki tepset iba osang tang tashi mejangjateti lir.
Yashi, Hokolbar nü mitkar tesep amaker nisung 12 shi tepsetba den külemi, pokshitsü aser tongpang nung amshitsü prangpong abener nisung 21 tashi apuba osang ka Burundi mitkar otongdar, Colonel Gaspard Baratuza-ia tanü metetdaktsü.
Kasa lendong nung Burundi mitkar züngsema nisung 3 tashi yashi amakertemi tepsetba osang jangjaogo ta pai ashi.
“Tan lendong ataloka tasümangtem yimti yimdong nung anguba ya Burundi nung tensa taoba mapang nungi tang tamajungba akümba kuli sayur. Sorkar aser sorkar anemba telok lenirtemi parnok rong nung tongpang rarabaren anentsüla,” ta United Nationsl Secretary General, Ban Ki-moon-ia tanü sangoktsü.
“Burundi tensa tang dang nungi tamajungba mekümdaktsütsü atema Burundi sorkar aser sorkar anemertem na tsüngda yimtenren senden tekaraba mapang nung amentsüla,” ta US’er UN ambassador, Samath Power-ia metetdaktsü.
Ano külen, “Mitkar tepuokdak puoka ayurtem tepuokdak nungi anizüktsü nükjidong nung yashi amakertemi mitkar tesep 3-ji amakba osang jangjaogo,” ta Burundi Tir’er media advisor, Willy Nyamitwe-ia tanü sangoktsü.
Burundi Tir, Pierre Nkurunziza-i taküm April ita nungi tenzüka tasembenren Tir menden abentsü maparen tenzükba sülen par Burundi nung tensa kanga mejungi akümba osang bushiteta lir.
Opposition teloki shilem magi agiba election nung takok ngua, Nkurunziza-i taküm July ita nungi tenzüka Burundi Tir menden benoka lir.