BUK ‘Warhead’ agi Malaysia tayimtsü kahzüka yok

The Hague, Oct. 13 (Agencies): Yaküm Malaysia Airlines flight MH17 tayimtsü kahzüka yokbatu Ukraine anüdoklen nungi Russia nung yangluba “warhead” ajanga kahzüka yok aser iba warhead ji tayimtsü cockpit tema nung apok, ta Dutch (Netherland) bushisüngdangertemi Mongolbar nü metetdaktsüogo.
Dutch Safety Board-i iba tayimtsü lendong atalokba ya kecha dak-a metongloktsü, aser parnoki bushitetba osangji osangbenertem senden ka nung metetdakja liasü.
Dutch Safety Board Chairman, Tjibbe Joustra-i, tayimtsü tsüokbaji cockpit abelen tsütsü warhead ka apokba ajanga liasü, ta sentepa alirtem dang metetdaktsü.
Iba warhead ji BUK surface-to-air missile ka liasü- aser ibaji Russia nung yanglur, ta Reuters osang ajanga metetdaktsü.
Joustra-isa ashiba agi, iba warhead apokba ajanga cockpit nung mena alir tayimtsü ketdangser asem pokset aser bushisüngdangertemi parnok temang nungji “high energy fragments” ngutetogo.
“Tayimtsü fuselage nungi yard (feet 3) ka tsüngda nung apokba ajanga structure raksatsü, koba ajanga tayimtsü tejaklen shisa. Tayimtsüji anüng tom nung apok aser 20-square-mile telungtet nung prokshi,” ta paisa ashi.
BUK missile system yangluba company-i parnok osang sangdongba sülen ghonda ishika tsüngda Dutch bushisüngdangertemi parnoki bushitetba osang ya sangdongogo.
Almaz-Antey-i, parnokia tetendangba agiogo aser ibaji Dutch osang den meputeper. Boeing 777 mesükba tayimtsü ka tejaklen anasa parnoki BUK missile ka pokdaktsü, ajisüaka MH17 poksaba yimya den balala, ta Company-i ashiba osang Reuters ajanga metetdaktsü.
Dutch Safety Board osang ajangasa, Ukraine anüdoklen tsütsü raraba tesem nung lendong metsübui tayimtsü senzüba atema Ukraine ketdangsertem, airlines aser tanga linüktema aitsüogo.
MH17 lendong matalokba anogo asem jakdang military tayimtsü ana kahzüka yoka liasü ta shia Dutch bushisüngdangertemi, “ibaji ajanga tekümdangtsü mera agia Ukraine anüdoklen tayimtsü senzüba nokdangtsü kuli tejangja liasü, ajisüaka Ukraine ketdangsertemi aji oda meinyak” ta ashi.
Yaküm, July 17 nü MH17 tayimtsüji Amsterdam nungi Kuala Lumpur tashi ayimba mapang Ukraine nung kahzüka yok, aser tayimtsü nung mena alir ajak (nisung 298) asü.