Bulgaria indang mezüngbuba Communications Satellite yokogo

June 24, 2017 (Agencies): Bulgaria indang mezüngbuba ‘geostationary communications satellite’ anüng tom-i yokogo, ta osang ka ajanga Honibarnü metetdaktsü.
BulgariaSat-1 satellite ajanga television aser communication service tem Europe aser North Africa nung agütsütsü aser iba satellite ya SpaceX ajang NASA Kennedy Space Center, Florida nungi Hokolbarnü 1910 GMT nung yokogo.
Iba satellite ya maneni alimar yimya ajanga teraksa adokdaktsüba, menoknok, yipru aser tzümetsüng amala lendong mapang ali nung amener aliba network tem mapa meinyakdang iba satellite ya amshitettsü.
“Onoki iba space project küm 10 tejakdang tenzükdang iba maparen takok angutsü atema longjemer bendanga aguja taremzük nung inyaktsü nüngdaker ta jangjaa liasü,” ta Bulgaria Sat & Bulsatcom CEO Maxim Zayakov-i ashi.
“BulgariaSat-1 onoki yokba ajanga Europe nung space nation tem rongnung lenir ka kümogo aser iba ajanga Bulgaria indang ‘high-tech sector’ tem aser ‘talented specialist’ tem renloktsü asoshi lenmang sadema lapoktsüogo,” ta pai-sa ashi.
Iba satellite ya alima nungi kilometre 36,000 (22,000 miles) tur amenoka lir aser iba ya küm 20 tashi amshitettsü. Taruba ita tem nung ground control room ajanga satellite mapa küma inyak tenzüka broadcast asütsü atema renemtsü asoshi tetendangba balala agitsü.
Bulsatcom pur iba million $235 project atema United States’ Export-Import Bank aser Deutsche Bank-i aniba consortium of European bank nungi sen teyari nguogo.