Bulgaria nung Khristantemi ghonda 7 Bible marathon agi

Sofia, May 26 (Agencies): Bulgaria linük kübok Sofia nung alirtemi Bodbarnü sentong tajung ka ayongzüka agiogo aser ibaji ghonda tenet atema ‘Bible-reading marathon’ agiba liasü.
Marathon ayongertemi ashiba agi, Bulgaria nungertemi asen Khristan maitsü meyipa arudaktsütsüla, ta Evangelical Focus osangkaket ajanga ashi.
May 24 nü Bulgaria nung ‘Day of the Cyrillic Alphabet’ amungba mapang ‘Bible-reading marathon’ ayongzüka agi.
Alemli missionary adianu ana- Cyril aser Methodius nati Laishiba Slavonic oshitem nung meyipzüktsü atema ojang tasen purapitetba sülen küm 1,150 ajungba tenüng nung ‘Day of the Cyrillic Alphabet’ amung.
‘Bible-reading marathon’ nung wadang balala nungi nisung 50 den temai shilem agi aser parnoki Sofia yimti tiyongtsü nung Laishiba lemsar azüng.
Iba sentong nung Eastern Orthodox, Roman Catholic aser evangelical Protestant Christian tem külemi longjemer shilem agi aser yimsüsürtem rongnungia taoba Bulgaria healthcare minister Dr Ilko Semerdjiev aden.
Putu 9 buba nung Cyril aser Methodius nati purapitetba ojang tasen dang Cyrillic ta ajar aser iba ojang ya tang-a Bulgaria aser Europe kübok Macedonia, Serbia, Bosnia and Herzegovina, Ukraine, Russia o Belarus linüktem nung amshir.
Bible marathon ayongertemi ashiba agi. ‘In the Beginning Was the Word’ omen nung ajemdaker agiba sentong ya kümshia agitsü imlar.
Word’ Association ketdangser Alexander Urumov-i iba sentong ya tanga Bulgaria jilatem nunga agitsü sentong lir.
“Tanü asenoki (Bulgaria nunger) asen Khristan maitsü shia arudaktsütsü kanga nüngdak” ta Urumov-i metetdaktsü.