Bullet train project-a demonetization ama asütsü: Chidambaram

New Delhi, September 30 (Agencies): Taoba mapang Union Finance Minister aser Congress lenir tain, P Chidambaram-i linük nung bullet train project tenzüktsü aliba aija, “Iba project ya demonetization ama asütsü, aser iba yagi ajak tepsettsü,” ta ashi.
Honibarnü pai twitter ajanga, bullet train project tenzüktsü agibo, iba senji railway nung lendong mataloktsü atema railway ajungkettsüba nung amshiba tajungba süla, ta ashi.
Mumbai nung suburban railway station- ana Parel aser Elphinstone na sendaktepba apu chirepba lendong nung nisung aika asüba sülen anogo ka lir tanü taoba mapang Union minister-i bullet train project aija jembiogo.
Bullet train project ya ajanga Maharashtra nung Mumbai yimti aser Gujarat nung Ahmedabad yimti na sendakteptsü aser iba dak sendakba nung Chidambaram-i, bullet train ya sensakertem atema masü saka takartem aser tulurtem asüküma senzütsü atema lir, ta ashi.
Chidambaram-isa, Railway Minister, Piyush Goyal-i bullet train project atema lemzüktsüba sen lakh crore kaji linük nung train lendong mataloktsü atema railway ajungkettsüba maparen nung amshitsüla, ta ashi.
“Bullet train ya demonetization ama asütsü. Iba ya ajanga ajak tepsettsü,” ta paisa ashi.
Pai twitter ajanga, “Railway Minister-i anogo ka lir iba tenangzükba agitsü akok. Sen lakh crore kaji rail lendong mataloktsü atema amshitsü, train lenmang jenjang ajungkettsü, signal ajungkettsü, saka bullet train atema mamshitsü,” ta ashi.
Taküm September 14, 2017 nü Ato kilonser, Narendra Modi aser Japan Ato kilonser, Shinzo Abe nati India nung mezüngbuba bullet train ajanga yimti ana sendakteptsü atema lung azüngtsüogo.
Sen lakh crore 1.10 project ya 2022 küm tashi nungbo tembanga inyaktsü imlar. Iba train ajanga ghonda ana nung kilometer 500 ayimjema senzütsü.