Bur telungpur parnok 300 bendanga agütsütsü imlar

Guwahati, August 28 (Agencies) : Assam kübok Hailakandi district nungi Bru nunger telungpur parnok 300 tashi bendanga agütsütsü imlar, ta Assam inspector-general of police Anurag Tankha-i metetdaktsü.
Tankha-i ashiba agi, police aser Bur nunger telok ana; United Democratic Liberation Army (B) aser Bru Revolutionary Army Union, Mizoram den arrtsü nung aliba Hailakandi district nung August 26 nü senden ka kaa sensaksemogo aser parboki bendanga agütsütsü asoshi molungtepogo.
“Ita ana tsüngda nung telungpurtem tenüng aser prangbong injangtem indang osang tejangja agütsütsü,” ta Tankha-i ashi. Parnok bendanga agütsütsüba anogo, tesem aser teyari balala agütsütsü alibatem telungpurtem tenüng list renemba sülen telemtetba agitsü aser iba atema mapang tatsükbo agitsü, ta paisa ashi.
Telungpurtemi bendanga agütsüba nung tongtibangtiba takhangbaji, Hailakandi district nung Reang nunger bulua aliba yimtsüngtem nung terenlok bener arutsüba atema lir. Parnoki ashiba agi, iba tesem nung aliba tesemtem kanga dang leni mao aser nüburtem kanga tepetzük tia nung lir aser parnoki item yimtsüngtem nung terenlok bener arudaktsüner.
Tankha-isa ashiba agi, parnok bendanga agütsütsüba ken o ya yaküm Guwahati nungi tenzüka jembiyonga arudar aser iba mapang nung Hailakandi superintendent of police Pranabjyoti Goswami-i dena shilem agi.
Katlicherra MLA Sujam Uddin Laskar-i telok anaprongla nungi lenir Guwahati-i anir aru aser state cabinet ministers Rihon Daimary aser Pramil Rani Brahma na den ajurutep aser telangzüba tajung ka angu, ta Tanakha-isa shisem.
Police aser civil administration ketdangsertem yashi mim senden ka ghonda ana shi kaaogo aser iba senden nung, Tankha, Goswami, deputy inspector-general Akhilesh Kumar Sinha, Cachar aser Karimganj SPs Rakesh Roushan aser Gaurav Upadhyay, 30 Assam Rifles officers Col S.D. Deshmukh, Major Jackson Jose, Col Jacob, Hailakandi deputy commissioner K.G. Bhuyan, additional deputy commissioner Amalendu Roy, Rajesh Chorki aser telungpurtem tenüng nung Dhanyaram Reang aser social workers Pitaram Reang aser Kiran Kumar Reang nunger aden.
Bru telungpur tanga telok ka; United Democratic Liberation Front pur 2008 küm parnok 300 dak tali chief minister Tarun Gogoi matsüngdang Guwahati nung bendanga agütsü.