Burkina-i par ken o bentetba atema pelar: Ban

Paris, September 24 (Agencies): Burkina Faso-i sorkar tasenba tentetba jakdang maneni par lenisang inyakdaktsütsü asoshi Michel Kafando shimshia par mangatettep ken o bentetba atema pelaba olen ka United Nations (UN) Secretary General, Ban Ki-moon-i tanü Brehostibar nü metetdaktsüogo.
Burkina Faso’er presidential guard züngsemtemi par lenisang, Kafando aser acting Ato Kilonser, Yacouba Issac Zida na den külemi, minister ishika tashiyim agi pua ayuba sülen Burkina Faso linük indang yimsütsü tashi tashiyim agi benokba osang ka tan September ita 16 nütu alima dang sangoktsü.
Ajisüaka, Burkina mitkartemi par tashi sayutsü tenzükba sülen General Gilbert Diendere-i aniba presidential guard teloki yimsüsütsü tashiji tanaben meyiptsütsü lemteta par mangatettep ken o tatembangleni aruba osang jangjaogo.
“Burkina linüki par mangatettep ken o bentetba ajanga par linük temzüngi melaba ama Tir aser legislative election sentong takok ngua agitettsü aser yamaji inyakba ajanga par linük indang sorkar tasenba timtem kecha majurui ozüngi melaba ama tentettettsü,” ta Ban-i tanü ashi.
Burkina ken o kanga junga bentettsü asoshi Economic Community of West African States (ECOWAS) ajungshiba den külemi, Burkina nung tongti shilem agirtemi pei nüburtem nem timtem toushi magütsütsü tajungshiba olen ka Ban-isa metetdaktsüogo.