Burma nung Khristmas mapang long agi Khristanpur yirutsü

Yangon, Aenjeti/Jan. 03 (Agencies): Burma (Myanmar) nung Buddhist nunger timba sür aliba yimtsüng ka nung ki ka sünga tamangertem adenshia lia mejangjaba nisungtemi long agi aon, aser iba lendong nung nisung trok yirua liasü, ta osang ajanga ashi.
December 17 nü nikongdang 8:00 ako meta Central Burma nung Magway Region kübok Kanta Kawn Township nung Khristanpur parnok 27 Khristmas sentong ka Paw Lwe yimtsüng nung agia aliba mapang long agi aon, ta ki kiburi Morning Star News dang ashi. Taoba küma iba tesem nung aliba Buddhist nungertemi kasa lendong ya agütsüba sülen Khristanpur dang yimtsüng toktsür aotsü shia liasü, ta pai ashi.
U Wah Daw-i ashiba agi, long kar agi par ki jara raksatsü aser pastor densema tamangertem kar dak teku, teperem aser teka nung yirutsü.
“Onok tetsübu agi ola madok aser iba mapang parnoki ozü kidang long agi aon. Onok sarasadema aliba mapang parnoki ozü kidang long agi aon. Ozü ki tera raksa. Ni iba ken o police nem agütsü,” ta U Wah Daw-i Morning Star News dang ashi.
Item long yagi gari aser chiyongtsütema raksatsü.
Item nisungtem yagi tesem ajungalen nungi long agi aon aser ki telungi aita raksatsü, ta iba tesem nung aliba Khristanpur temi ashi.
“Iba lendong agütsüba maparen nung temulung melemi aliba nisungtem bushiba mapang lir. Tang tashi onoki shinga pua mali aser iba lendong nung nisung aikati shilem agi ta onoki meteta lir,” ta Min Ywa police station nung police ketdangser kati ashi.
Lendong agütsürtem nem obendang agütsütsüla aser tamangba yimsü dak sendakba benjong nung teka sangshiba ya ozüng alema lir, ta Magway region nung ozüng yanglur, Aung San Myint-i osangbener dang ashi.
Buddhist nunger timba aliba iba yimtsüng nung ethnic Chin Khristan kibong pezü dang lir, ta iba tesem nung alirtemi ashir.
Burma nütsüng yongsük shilem 80 Buddhist aser shilem 9 Khristanpur lir.
Iba linük ya Khristanpur busemba lokti tentet, Open Doors’ ajanga Khristanpur alitsü asoshi tamajungtiba linüktem asadangba 2018 World Watch List nung jenjang 24buba nung lir.