Burma nung telungpurtemi Khristan lennir 90 dak tali apu

Yangon, Mongputeni/Oct. 03 (Agencies): Rongjui/September tetenzüklen tekülem ki tajemba agi ter shi shibangtsüba sülen Burma (Myanmar) anüdoklen ethnic Wa telungpurtemi Khristanpur inyakyim nung timtem agütsütsü mechi tekülem ki ter dak tali shibangtsü aser Khristan lennir 92 den kaketshir 42 pua ayu, ta osang ajanga ashi.
United Wa State Army (UWSA) ajanga Rongjui tatemlen Khristan lennirtem aser kaketshirtem ya parnok kübok aliba Shan state tesem nung pua ayu, ta Lahu Baptist Convention ajanga Rongjui 25 nü sangdong ka ajanga ashi. Kaketshir ya karbo tashiyim agi UWSA sepai ama inyakdaktsü, ta kasa sangdong nung shia lir.
Mong Pauk Township nung tekülem ki 52 shibangtsü aser UWSA ajanga tekülem ki asem raksatsü aser kangki ama Khristanpur temaitsü ajak indoktsü, ta ethnic Lahu Christian lennirtemi ashir. Tamangba yimsü dak ajemdaker lapokba kaketrejua ishika shibangtsüogo.
Rongjui tetenzüklena UWSA teloki Kachin Baptist Convention (KBC) indang tekülem ki trok densema Khristanpur tekülem ki ter shibangtsü.
“Wa ketdangsürtemi Mong Pauk nung Khristanpur tem dang tangbo kidanga tekülem sentong magitsü totuyuba agüja lir. Anungji Khristanpur karbo Mong Pauk nung malir. Tetsübu agi parnok Keng Tung jila nung arua lir,” ta Keng Tung nung aliba Khristan lennir kati Morning Star News dang ashi.
Wa sepaitemi Mong Maw jila nung Khristan lennirtem aser kaketshirtem apur aser iba tesem ya Wa telungpur meyong amai lir, ta iba tesem nung alir Tat Jack-i ashi. Tat Jack’er kinungertema Wa telungpurtemi pua lir.
“Kübotanubo ya sayutsüngir ka li. Pa ya Wa telungpur amenoka aliba Panghsang yimti anasa yimtsüng ka nung alir. Pa aser par jabaso Rongjui tetenzüklen apu. Saka parnok semdangtsü parnoki memelar. Iba yimtsüng nung alir Khristanpur aika pua lir ta onoki angashi,” ta Tat Jack-i ashi.
Item telungpur yagi tribal nisungtemi amangba yimsü amanger aser Khristan yimsü prokshiba ajemdaktsütsü meranger. UWSA teloki Khristanpur ya talitabong aoba ajanga apu, ta Wa telungpur odongtar, Nyi Rang-i Yangon nung aliba osangkaket, The Irrawaddy dang ashi.
UWSA sangdong ka Rongjui 13 nü agütsüba nung, 1992 küm sülen yangluba tekülem ki ajunga raksaa indoktsü mesüra shibangtsü, kechiaser item tenlaki ya UWSA lennir nungi temelaba magie yanglu, ta shia lir.
UWSA meyong television sentong ka nung, lokti dentet indang temzüng aser Wa-i yimsü asüba tesem nung bendangertem tamangba yimsü lennir inyakdaktsüba nokdangba temzüng nung aibelenba ajanga tamangba yimsü lennirtem apu aser asüngdangya asü, ta ashi. Pua alir kari ethnic nisungtem Khristan yimsü dangi tashiyim agi meyipdaktsü, ta parnoki aitsür.
Ethnic Kachin political party, Kaching National Congress nung mendenpuba, Dr. M. Hkawng-i ashiba agi, “Missionary temi Wa region nung ethnic kintem taküm jenjang ajungkettsür, kaket shisatsü agütsür aser parnok ajanga Japan, United States aser tanga linüktemi kaket shisatsü angazüktsü asoshi oteter.”
Wa territory nung aliba nütsüng timbai tanüla mesüra Nats külemer, aser yangji Buddhists yimsü amangera lir aser Khristan yimsü asüyonga Baptist aser Roman Catholic teloktem lir. Iba tesem nung aliba ethnic kin tilatem, talisa Ahkar, Lahu, Kachin aser Wa kintem nung züngsem aika Khristanpur lir, ta osang ajanga ashir.
Tawa Khristanpur anema iba ama tashiyim mapa inyakba ya China nunger ketdangsürtemi südi, ta karibo temulung malemer.
UWSA ya United Wa State Party (UWSP) indang military wing ka lir, aser parnok ya iba tesem nung ruling party indang lir. 1989 küm Communist Party of Burma indang armed wing laoba sülen iba telok ya tenzük.
UWSA ajanga par litsü ya Wa State Government Special Administrative Region ta Aenjeti/January 1, 2009 küm sangdonga liasü aser Burma sorkari parnok nem temaba tashi temeden magütsüi liaka Burma sepaitemi UWSA den külemi Shan nationalist telungpurtem den rara.
Burma nütsüng shilem 80 Buddhist aser shilem 9 Khristan lir aser Open Doors’ ajanga Khristanpur alitsü asoshi tamajungtiba linüktem asadangba 2018 World Watch List nung iba linük ya jenjang 24buba nung lir.