Burundi-i mitkar 5000 yoktsü lemteter: African Union

Addis Ababa, December 19 (Agencies): African Union (AU)-i tang mepetmesü adoka tensa mejungi aliba Burundi linüki züngsem 5,000 densemba teloktep mitkar telok ka yoktsü lemtetogo.

Burundi-i ajurushia aliba tensa tamajung azüoktsü maparen nung Burundi police aser mitkartem den yariteptsü nükjidong nung police aser mitkar züngsemtem densemba mitkar telok ka Burundi-i yoktsü telemtetbaji AU kübok tentetba Peace & Security Council (PSC)-i yashi Hokolbar nü agi.

Burundi linüki taoba mapang ama, tan mitkartem yoktsü sentongji magizüktsü lemteta lir saka Burundi-i memulungaka, AU mitkartemji Burundi linüki oda yoktsü lemtetogo.

Taküm April ita nungi tenzüka Burundi linük nung mangatetep ken o adoka tongpang raratsü tenzükba sülen joko nübur o nübur na rong nung tongpang raratsüsa tensa ajurutsü tenzükba mapang ka nung AU-i par mitkartemi Burundi-i yoktsü telemteta ya agir lir.

AU densema, alima tashi abenba linüktemia Burundi nung tensa mejungi akümba atema tebilemtsü khuret benoktsü tenzükogo.

Burundi tensa azüoktsü, nübur takümtem kümzüka ayutsü aser mangatettep adoka aliba teloktem rong nung jembiteptsü senden mentettsüsa nungdakba maparen inyakdaktsütsü asoshi AU-i par mitkartem Burundi-i yoktsü tan renemer lir.

Taoba mapang nunga Burundi sorkar aser sorkar anemer na tsüngda yimjung senden ishiben amen saka senden amenba ajanga yimjung bener maruteti lir.

Ano külen, Burundi nung adokba mangatettep ken o bentettsütsü nükjidong nung par ambassador ka Burundi-i yoktsü renemba osang ka United Nations (UN) Secretary General, Ban Ki-moon-ia tan hopta tetenzüklen metetdakja lir.

Tir Pierre Nkurunziza-i Burundi Tir menden tasembenren abentsü sentong renemba osang sangoktsüba sülen taküm April ita nungi tenzüka Burundi nung tensa mejungi akümtsü tenzük.

Linük temzüngi memela aka, pai alizüng ayuba ama, Pierre-i taküm July ita agiba Tir election nung takok ngua, Burundi Tir menden tasembenren abentsü jenjang ajangzüka lir.