Nobel Peace sempet agizükla, Pakistan tsür, Malala Yousafzai (Achijilen)-i Rwanda linük nung tentetba Mahama refugee nisungtem jenokdak jenoka alir Burundi refugee nisungtem den ajurutepdang agiba noksa ka yangi angur. (Mahama, July 15)
Mahama, July 15 (Agencies): Burundi sorkari par tepuokdak puoka ayur kaketshirtem chioktsü temepishiba olen ka Nobel sempet agizükla, Malala Yousafzai-i yashi, Brehostibar nü metetdaktsüogo.
“Kaket shisatsü anguba ajanga dang tarutsü putu-i takok angutsü,” ta shia, Burundi Tir, Pierre Nkurunziza noksa nung zülusaba ken o nung ajemdaker tepuokdak puoka ayur kaketshirtem chioktsü olenji Pakistan tsürla, Malala-i metetdaktsü.
Linük temzüngi memela aka Tir menden tasembenren abentsü asoshi Tir election nung candidate ama tokteptsü osang sangoktsüsang, Nkurunziza noksa nung tezülutsü oset agi zülusaba ken o nung ajemdaker Burundi sorkari kaketshirtemji taküm May ita tepuokdak puokba osang bushiteta lir.
“Tan tepuokdak puoka alir kaketshirtemji tepuokdak masü saka kaket reju nung alitsü nungdaker. Anungji, parnok tekaratiba mapang nung chiokadoktsü atema Burundi sorkar dang mepishir,” ta Malala-i kidangsüa, Rwanda linük nung tentetba Burundi nunger refugee nisungtem jenokdak semdangdang metetdaktsü.
Nkurunziza-i aniba Burundi sorkari ozüng tesashi amshiba maremteti par Burundi toktsüba refugee nisungtem Mahama jenokdak jenoka aliba osanga jangjaogo.
Ano, refugee küma alir lanurtemi pei mangdang kodanga mesamadaktsütsü tajungshiba olen ka alima ajunga nung tetsürtem talisa, tetsür chanutem nem kaketshisatsü bushitsü temeten agütsütsü asoshi nokdakla, arishi küm 19 tain Malala-i sangoktsü.
Mahama refugee jenokdak jenoka alir Burundi nunger refugee nisung 48,000 rong nung kaketshisatsü bushitsü maongka mongui alir tila tanur 2,700 dak tema densemba osang bushiteta lir.
You must be logged in to post a comment Login