Burundi Tir aser Opposition lenirtemi jembiteptsü mulunger: Ban

Bujumbura, February 23 (Agencies): Burundi Tir, Pierre Nkurunziza-i opposition lenirtem den tsüngdong ajurutepa jembiteptsü senden amenba ajanga par Burundi linüki küm 1 shi tejaklen nungi tenzüka ajuruba yimtenren mangatettepbaren bentettsü mulungba olen ka United Nations (UN) Secretary General, Ban Ki-moon-i tanü, Mongolbar nü metetdaktsüogo.

Ban-i yashi, Hombar nü Bujumbura tonga aoba sülen Burundi yimsüsür aser lokti tentet lenirtem den ajurua senden balala amenba sülen pai tanü iba olenji metetdaktsü.

Ajak anioktsü senden nung telok ajungai shilem agitsü renemba osang ka Ban-isa metetdaktsüogo.

Nkurunziza aser pa anemertemi tsüngdong ajurutepa senden amenba ajanga par mangatettepbaren agientsü ajungshitsü asoshi UN Security Council (UNSC) telok kati Burundi ita ka shi tejaklen semdangba sülen Ban-i tan Burundi semdanger lir.

Nkurunziza-i linük temzüng anema inyaktsü lemteta, pai par linük Tir menden asembenren abentsü nükjidong nung linük Tir election nung candidate ka ama shilem agitsü osang sangoktsüba sülen yaküm, 2015 küm April ita nungi tenzüka par Burundi linük nung yimtenren tensa kanga mejungi akümba osang bushitetogo.

Burundi nung mangatettep adoka tongang raratsü tenzükba sülen tanü tashi nung nisung 400 dak tema taküm samaba aser nisung 230,000 dak temai pei talidak melitettsüsa küma tesem balala nung jenoka aliba osanga jangjaogo.

You must be logged in to post a comment Login