Bushisüngdangtsü atema India NSG teloki B’desh semdangtsü

New Delhi, July 07 (Agencies): Kiralongraba anema India aser Bangladesh na mapangshia amalitepa inyaker aser maneni taoba hopta ka tsüngda kiralongrartemi anaben tashi Bangladesh amakba bushisüngdangtsü atema Hokolbarnü India’er National Security Guards (NSG) team ka Bangladesh-i aotsü.
Osang ajanga ashiba agi, NSG nung Lt Colonel rank officer ka lenisüba nung züngsem pezüi Bangladesh semdangtsü aser iba atemaji ministry of external affairs-i temelaba agütsüogo.
Iba telok jagi kiralongrartemi amakba tesem ana semdangtsü aser iba mapang nung amshiba tapoktsütem shisadangba den külemi tanga kulitem bushitsü. NSG-i Bangladesh semdangtsü atema Dhaka’s Special Forces Establishment-ia agizükogo.
NSG nung National Bomb Data Centre (NBDC) lir, aser parnoki linük nung bomb amshia amakba kulitem bushir.
NSG team jagi July 1 nü kiralongrartemi bakery ka nung nisung 22 tepsetba tatalokba kulitem aser tanü Bangladesh nung kiralongrartemi bomb pokdaktsüba tatalokba bushisüngdangtsü.
NSG ya 1984 küm tentet aser taoba mapangtem nunga kiralongraba tatalokbatem anema bushisüngdangtsü atema parnoki tesentaktep tajung aliba linük karbo semdangogo.
Tanü Bangladesh, northern Kishoreganj district kübok Sholakia nung Islamists kari bomb pokdakja police den kahtepdang police ana den tetsür ka asü aser nisung 13 yiru. Kasa tatalokba nung kiralongrar kata tepset.