Business Association of Nagas (BAN) Council senden kaogo

March 17, 2017 nü Elim Hall, DABA Dimapur nung Business Association of Nagas (BAN) senden nung tangokba noksa ka angur. 

Dimapur, March 19 (TYO): Business Association of Nagas (BAN) tasembuba General Council senden March 17, 2017 nü Elim Hall, DABA Dimapur nung kaogo, aser iba senden nung tetushi tejaokerji Commissioner of Taxes, Government of Nagaland, Asangba Chuba Ao, IAS liasü, ta tanü Media Cell, Business Association of Nagas-i tanü sangdong ka ajanga metetdaktsü.
Formal senden nung Rev. Lunen Jamir-i sarasadem aser Dr. Lanusangla Tsudir menden aser Dr. Yan Muru secretary süa senden amen.
BAN Chairman, Thungbemo Murry-i züngsemtemi pelaa agizük, BAN General Secretary, Dr. Khekugha Muru-i BAN mapatongtem den records metetdaktsü aser Vitho Zao-i tepela anküp o jembia liasü.
Tetushi tejaoker o jembidang Asangba Chuba-i, GST ajanga lenla ajak nung kongshitsü ta shia GST indang merajemibo shishilembabatem shibangtsüsa akumtsü, anungji GST ajak nem rajema kümdaktsütsü atema department-i inyaktsü, ta metetdaktsü.
Goods & Service Tax (GST) ya July 1, 2017 nungi mapa küma inyaktsü sorkar sentong lir.
Business hour mapang Naga nunger entrepreneurs aser shishilembartemi ajangshiba tebilemtsü onüktem nunga o lemtepa liasü.
Senden nung financial year 2017-18 atema budget agizük aser “Nagaland International Trade Expo” ayongzüka akatsü atemaa lemtet, koba ajanga local entrepreneurs ajangzüktsü aser Nagaland nung shishilembaba jenjang tajungba akumtsü.
Senden nungsa tamalen bangzünga aliba lepshia, October 31, 2013 nü Naga loktii lemtetba ama Naga entrepreneurs-i “Sorkar ka saru ka” matalok tashi NPGs nem saru magutsütsü bangjemogo.
Senden nungsa Naga yimtenren teloktemi saru atema BAN certificate alir Naga nunger entrepreneurs shinga amokmeren masutsüla ta bangjem, ta kasa sangdong nungsa shia lir.