Business Association of Nagas-i ACAUT pusemer

Dimapur, August 24 (TYO): ACAUT-i tanen makai aser anibelem arema ochimashi aser tim masüba maparen anema mapa inyakba atema kanga pelar, ta Business Association of Nagas (BAN)-i ashi.
Nagaland nung terenlok malibaji ochimashi aser tim masüba maparen ajanga lir aser item mapaji kanga dang odia inyaker. Linük nung ochimashi agi sünger aliba state ji asen Nagaland lir. Tarendakba kecha melii aser mesasai ochimashi inyakba ajanga ketdangsübaren ajunga menentsür aser Nagaland nung kanga dang odia aser yimjak nung ochimashi mapa balala inyaker, ta BAN-i sangdong ka nung ashi.
Naga nunger shishilembartemi tetsükdaktsü aser timtem zünger mezüngma ajurur kechiyong Non-Local temi bangdak ketdangsertem nem süpokrem agütsüba ajanga Local Business community pur hao ta mali yutsür, ta parnokisa shisem.
Nagaland nung ochimashi aser sorkar ketdangsübaren nung tim masüba agi sünga aliba anema ACAUT-i Public Rally ayongba nung BAN-ia pusema nungiter. Iba rally nung BAN züngsem ajak adentsü mepishia metetdaktsür, ta BAN sangdong nungsa shia lir.