Business Association of Nagas-i aitsür

Dimapur, April 26 (TYO): April 20, 2017 nü supervisor-i anir NSCN(IM) züngsem kati Dimapur nung Naga entrepreneur temi lapokba dokantem mita aoba kukua aitsür, ta Media Cell, Business Association of Nagas (BAN)-i metetdaktsü.
Parnoki Daily feed, Clothing World, Hot Topic, Liz’s studio, American boutique, The Blossom, The Shop aser Furtados dokantem mita ao aser idangji dokan kar nung tangalen nungi bener arua ayokba aser ‘locally produced products’ nung jenjang atakba atema ashishi. Ano, parnokisa dokan kar nungbo ‘price tags’ melii osettem ayokba atema ashishitep aser IPC Arrla 420 nung aitsütsü ta amokmeren.
April 21, 2017 nü dokan kiburtemji Nagarjan Junction nung restaurant kati jaok aser parnok shia dang sen 50,000 senchi meshi, saka kiburtemi senji magütsütsü ta ashi. Iba sülen senchiji sen 20,000 tashi alu aser iba anogo nikongdang 2:00 ako tashi nung agütsütsü mapang latettsü. Ibaji magütsüra dokantem shibangtsütsü ta amokmeren, ta Media Cell sangdong nung shia lir.
April 22, 2017 anogo nunga parnoki dokantemi ao aser dokan kibur o mapa inyakertem dang o tamajung shia merenshi aser parnoki tuyuba ama meinyakra lendong ajurutsü ta amokmeren aser amokmerenba tetsübu nung dokan anabo shibangtsüsa aküm, ta BAN-isa ashi.
Telungpurtemi jenjang latetba inyakyim memeteti, sen meshizüktsü atema dang tenük amor mapa meinyaktsüla. Baht aser Dollar amala foreign currency ajanga bendanglen nungi osettsüset alia bener arua India nunger sen nung meyipzüker ayoker. Kasaji, ‘locally produced goods’ ji tayoker aser teyangluri asadanga jenjang lateter ayoker. Nagaland nung regulated & controlled market mali, anungji talirtemi parnoki aginüba jenjang nung lijaliyonger, ta BAN-i shisem.
Telungpurtemi Naga entrepreneur tem meinprong masütsüla. Mashimemetetba züngsem kari sen meshizüka agitsü mechi nung mapa inyakba ajanga telok ajunga atema maaksü ang bener arutsür. Maneni, ozüng amertemi iba mesükba inyakyim mita reprangtsü atema mepishir, ta BAN-isa mepishia metetdaktsü.