Busta Rhyme Gym nung raratepba atema apu

August 06, 2015: Rap kentener, Busta Rhyme Steel Gym, New York nung exercise agidang yangji inyaker ka den mangatettep tila ka adokba maremzükteti pai ama aliba energy drink bottle ka iba sang dangji mereploktsü, ta osang kar ajanga ashi.
Rap kentensangi gym nung inyaker dak bottle mereploktsüba ken o nung police-i pa pua lir.
New York Daily News osangkaket ajanga metetdaktsüba agi, arishi küm 43 tain kentensang, Busta ya Bhodbar aonung 8:30 akok meta Steel Gym nung inyaker ka den mangatettep adoka protein bottle ka onloktsüba ajanga police-i pua lir.
Gym nung inyaksang dak Busta-i mereploktsüba bottle ji 17 ounce (gram 482) shi taret liasü aser iba bottle jagi pa dak tekolok tesülen onshia. Police temi Busta apui arudang yangji inyaksang jagi pa kanga tashii meyiru anungji mozü kidangia maotsü, ta ashi.
Busta ya 1990’s nung ‘Turn It Up / Fire It Up’ aser ‘Gimme Some More’ ken atenba ajanga kanga nüngtugusa liasü.
Busta Rhymes meyong okatsür, Scott Leemon-i, iba ken o ya kecha tuluka masü ser nung nüngtugu nisung asüba ajanga tulu ka amai akümer saka mela-mela koktettsü, ta TMZ osang ajanga ashi.
Pa tenüng shitakbabo Trevor Tahiem Smith lir aser pai 2006 küm pa indang gari nung nisung kati metsü metsüloktsüba ajanga teka sangshi. Küm ana lira no 2008 küma pa indang gari anisang dak azükba ken o nung küm asem tashi tepuokdak ayu. Anungji pa dak iba amala ken o atalokba ya tan tasen masü.
Aji dang masü saka 2003 küm pai concert reprangi ao’er ka dak teka aiba atema temonok US sen 75,000 agüja liasü.