Byelection agira BJP-i takok angutsü: N Biren Singh

Imphal, May 1 (Agencies): Manipur nung taoba Congress MLA troki BJP nung adenba atema anti-defection law kübok parnok aitsütsü akok, saka BJP-i MLA 6 indang menden nung byelections agira parnokisa takok angutsü ta metetdaktsü.
“Parnok (taoba Congress MLA tem) kibong nung denogo. Anti-defection law kübok parnok indang menden asoshi byelection agitsü tuyura, BJP-i parnok pusema yaritsü” ta chief minister, N Biren Singh-i ashi.
Manipur nung züngsem 60 agi akümba assembly nung Congress-i menden 28 nung takok angu saka tang parnok MLA 22 dang kümogo. Külen, BJP-i menden 21 nung dang takok angu saka tang parnok MLA 28 jungogo.
BJP-i aniba teloktep sorkar nung MLA 38 lir aser parnok rongnung Naga People’s Front aser National People’s Party nungi MLA pezüzü, Lok Janshakti Party nungi MLA aser Independent MLA ka dena lir.
“Parnok ajaki pei pei constituency nung nübortem den asüngdangtepa sülen ang BJP nung aden. Vote agütsürtemi MLA tem aser BJP aginür, anungji parnoki byelection tsübua mali. MLA temi pei menden nung takok angutsü ta amanger. Iba denji, Manipur nung dang masü saka state balala nung BJP-i takok nguyonga arur” ta Biren Singh-isa shisem.