C. Apok-i Mokokchung power house semdang

Dimapur, September 6 (TYO) : Tourism parliamentary secretary, C. Apok Jamir-i September 5 nü Mokokchung jila nung aliba power house semdang aser tesüiba anogo tugu tashi power timtem indang osang metetpela.
Iba mapang Division engineer, Er Moa-i parliamentary secretary dang power supply peria magütsütetba timtem indang osang lemsatep aser department-i takokba tashi transformer yanglutsü merangdar ta ashi.
Iba mapang parliamentary secretary C. Apok-i tang aliba power station/transmission ya tajungba yanglushitsüla ta ashi.
Iba khuret ajanga tesüiba anogo tuku tashi nübortem timtemer aser talisa shishilembaba mapa inyakertem mapa meinyakteter, ta Apok-isa ashi.
“Tanü putu nung taküm liyonga atema electricity ji tongtiret ama lir, anungji tarutsü dak rangloker power supply ajungketba mapa inyaktsüla” ta paisa ayongzük.
Tourism parliamentary secretary, C. Apok Jamir-i Power parliamentary secretary den ajurutepa Mokokchung nung tang power supply khuret indang osang lemsateptsü.