C-Edge College, Dimapur nung Faculty Development sentong agi

Dimapur, Aami/June 22 (TYO): Tanü College Conference Room nung Internal Quality Assurance Cell (IQAC), C-Edge College-i ayongzüka Faculty Development Programme ka agiogo.
Iba workshop ji ‘Intrapersonal and Interpersonal Relational Skills’ onük nung ajemdaker agi aser shisalen sayurji Dimapur Ao Baptist Arogo (DABA) Counselor, Dr. N. Moa Imsong liasü. Iba sentong ya English Department nung Assistant Professor, Kr. Yimwapangla Jamir leniba nung agi aser College Principal, Dr. Chubatola Aier-i telok pelaa agizükba den külemi okila jembia liasü.
Management Studies Department nung Assistant Professor, Inza-i sarasademba sülen technical session agi aser shisalen sayur, Dr. N. Moa Imsong-i nisung ka dak yimya balala, peisasa pei angatetba den tangar angatetba ajanga tesendaktep tajung yutetba indang jembi.
Pai ketdangsüa Myers-Briggs Test Indicator (MBTI) practical shilem ka agi; iba ya peisasa pei asadanga report agütsüba questionnaire ka liasü.
Shilem agir ajaki iba tetendangba nung shilem agia pei dak aketba yimyatem, tashi balaka aser peii sapubatem jangjatsü merang.
Iba dak alia Dr Imsong-i, nisung kati tangar yimya balala angatetba ajanga pa den alirtem den tesendaktep tajung koma yutettsü, iba indangji angatetdaktsü.
Tanabuba technical session nung interpersonal relational skills indang agia liasü. Dr Moa-isa interpersonal skills ajanga college nung kaketshirtem junga anitettsü atema tesayuba agutsü.
Yisu Khrista taküm kuli nung ajemdaker pai, nisung ajak agizüktettsü, tenoktenoka angatsü, chichia pelaba lemsatepba aser taochi agi anepaluba indang lemsatep.
Technical sessions ji o lemtepa tembang, aser iba mapang nung shilem agirtemi parnoki ajangshibatem lemsatepba nung ajemdaker o lemtep. Tatemsa IQAC Coordinator, Wabanginla Ao-i anküp o jembia certificates agutsü.