C-Edge College-i Kiremwati Ao nem ‘Architect of Education’ tenüng agüja tushi

Dimapur, March 21 (TYO) : March 21, 2017 nü C-Edge College-i Wb Kiremwati nem ‘Kiremwati Chair’ amenoka tetushi agütsüba sentong ka agiogo.
College Tir, Er. Moa Aier-i, alima rangben nung university balala aser kaketreju nung ‘chair’ jatetba amenokba tetetzü rateta ashidang iba inyakyim ya 176 AD mapang nungi tenzük, ta ashi.
Chair ka dak keta alibatemji college nungi inyaker tajung maotsüsa atsüa arua ayuba, bushisüngdang mapatem ajungmesoa inyakdaktsüba aser tesayuba agütsüba den seminar aser workshop tem akaba lir.
Iba sentong nung Tongti Tesemdanger, Retd. IAS aser taoba mapang Secretary, Government of Nagaland, R. Ezung-i pa dang sayusang, tesayur Kiremwati nem tenüngsang agütsü.
Pai, küm 50 shi tejakdang pai kü tesayur liasü ta bilemteta lemsatep. Pai taküm libaliro aser tesayur mapa inyakba mapang Tsüngrem akhümtsübua inyakba kuli agütsü.
Pai missionary ka dak aliba tejangraba yimya agi onok dang sayu aser pa Nagaland nung nükjidong tulutiba tongteter rongnung ka lir, ta Ezung-i ashi.
Kiremwati-i tangar dang sayuba ama pa taküm agi liteta sayu aser iba jagi pa takümji kaketshirtem aser pa den külem inyakertem asoshi tatishitsü taküm ka liasü. Pai sayuba kaketshirtem aika IAS aser IPS den Director, Doctor aser Chief Engineer tem kümaogo.
Sentong nung o jembiba mapang Kiremwati-i, Tsüngrem nem tenüngsang agütsü aser pa tesayur mapa inyakba mapang mangoba Tsüngrem teka agi pa taküm tila aniba lemsatep.
Pai 1983 nung Director of Higher & Technical Education mapa inyak aser 1986 nung North East Hill University (NEHU) nung Naga nunger rongnungi mezüngbubasüa, Pro Vice Chancellor mapa inyak.
Pa mapa nungi anenba sülena küm aika kaketshitsü agütsüba tsütsü maneni nungita inyak. 1999 küm pa Nagaland Education Commission nung mendenbuba mapa inyaka liasü aser 2005 nung Education Consultant mapa toktsü.
Tesüiba mapang ABAM Secretary aser tang Missionary at large, Rev. Kari Longchar aser Kiremwati-i sayuba kaketshir ka nati iba chair amenokba meshiteta aser sentong tembanga sarasadem.
Iba sentong nung Sociology nung HOD, Vitsusie Savino meden liasü aser Assistant Professors of Management & Economics Department tem nung Assistant Professor tem Lipokmarla aser Imsuakum nati ken ka aten.
Sentong nung tesüiba mapang Kiremwati-i sayutetba kaketshirtem, shirnok taküm kanga junga amenteter ali, parnok aika den Board of Governor züngsemtem, par kinungertem aser college nung tesayurtem den kaketshirtem dena aden.