C-Edge College nung 5buba Commencement Day agiogo

Dimapur, Metsüremi/March 22 (TYO): Naga United Village, Dimapur kübok March 22, 2019 Hokolbarnü Goyiepra Kenye Auditorium (College campus) nung C- Edge College-i 5buba Commencement Day- class of 2019 sentong ayonga agia liasü.
Iba Commencement Day sentong nung Director Information Public Relations, Limawati Ao-i semdangba den külemi o jembia liasü. Sentong nung o jembiba mapang pai, tawa tanü alima yimya kanga dang kara melenshia aobatem indang kaketshir dang metetdaktsü.
Iba olen nung ajemdaker, “Alima kanga kara ainba den liromedema ayonga alitsü asoshi asenoki innovation/creativity tsütsü semloka inyaktsüla,” ta ashi.
Tesüiba stone age mapang nungi tang Data age tashi meimchirtem shisatsü melemnshia liyonga aruba indang nung rasa jembiba mapang, meimchir tangatetba tsütsü kanga dang kara renloka aoba kong iba inyakyim ya kija kati anendaktsütsü maokoba saka iba tangatetba den semloka aotsü indang tajitetba ka Limawati-i lemsatep.
Pai, kaketshirtem dang nükla ka nung junga rangloker inyaktsü aser tashiita alitsü atema tetuyuba agütsü.
“Tawa tanu internet putu ka nung asenoki tarutsü career yanglutsü atema nüngdakba osangtem yimya küma amshitsü,” ta pai tetuyuba agütsü.
Pei dak aketba sempet aser tashi yari career atema tejakleni aotsüla ta asüba tajungshiba olen ka den paisa, ” Nai nü tjaba metetra, nai junga inyaktsü aser lokti atema temelenshi bener arutsütsü,” ta ashi.
Maneni, sentong nung, Limawati-i year book 2019 sayaa aser category balala nung ollege award agüja liasü.
Kasa sentong nung college toktsür aoer kaketshirtemi Pledge of Allegiance agi, student representative temi o jembi aser ken tena liasü.
Er.Moa Aier-i telok pela agizükba o jembi aser Tsüngremer temoatsü meshizüka Asst.Professor, Inza-i saradasemtsü.
Iba sentong nungsa, Principal, C- Edge college, Dr. Chubatola Aier, faculty aser staff den kaketshitem denogo.