C. Kipili-i 21 buba MDFA football asayamong tenzüktsüogo

Mokokchung, October 06 (TYO): Nagaland Power Minister, C. Kipili Sangtam-i 21 buba Mokokchung District Football Association (MDFA) Trophy 2015 Mokokchung kübok Imkongmeren Sports Complex nung tanü Mongolbar nü tenzüktsüogo.
“Ao kini taoba mapang nungi tenzüka asen Nagaland rendaktsütsü asoshi tongti shilem agia aruogo. Tarutsü mapang nunga meneni terenlok lidaktsütsü asoshi lanurtemi bendanga agüja inyaktsü ajungshir,” ta tongti tesemdangeri metetdaktsü.
Saisapongtsü sempet tajung aketba lanurtem ajungmesotsü nükjidong nung state sorkari saisapongtsü shilem temaba jenjang nung ajungktettsütsü mapatong aika tenzüka lir ta shia, lanurtemi maongka tajung ajak ajangzüka saisapongtsü shilem nung takoker asütsü merangtsüla ta pai ashi.
“Tanü asayartemi temulungtetba tajung ayuba ajanga parnoki taoba mapang India talisa, Naga nunger nem konang bener arutsüsang, Dr. T. Ao ama national aser international jenjang nung shilem agitettsü. Tanü ama tongti anogo nung pa ama samanir nem tetushi aser aküm agütsütsüji kanga dang tapet lir,” ta Kipili-i ashi.
Tanü sentong nung asayamong tayonger luden mendenbuba, Meyisanger Lemtur-i tarur ajak pela agizükba sülen Mokokchung Chancel Choir aser Naga Orpheus Finalist, Yapangtula-i kentena sentepa alirtem tsüratemdakja liasü.
Tan asayamong nung mezüngbuba aser tanabuba jenjang anguba telok 2 nem senpet sen lakh 1 aser sen 60,000 agütsütsü renemba den külemi, semifinal nung tamakok angur telok 2 nema senpet sen 15,000 agütsütsü renema lir.
Pool A nung NU Lumami, Elation SA, YA Marepkong aser defending champion, Fusion SC; Pool B nung Arrjusanger FC, Youngster’s FC, Walunir Ritsung Artang aser B Squad FC; Pool C nung Sports Society Soyim, Onet Korang SC, Dilong YA aser Shitilong SA aser Pool D nung Shooting Starz FC, Zonipang SA aser OCYA nunger densema ajak agi telok 15-i tan asayamong nung shilem agitsü renema lir.
Ano külen, tanü asayamong tetenzükba asaya nung NU Lumami teloki goal 2-0 agi Elation SA madak takok ngua liasü.
Asüng, Bodbar nikongdang 1:00 ako nungi tenzüka YA Marepkong aser Fusion SC na mezüngbuba aser Arrjusanger FC o Youngsters FC na tsüngda tanabuba asaya asayatsü lemzüka lir.