C.Moayanger Jamir ordain süogo

Dimapur, March 26 (TYO) : East Dimapur Ao Baptist Arogo (EDABA) nung Associate Pastor Wb.C.Moayanger Jamir Tsüngrem tenzükba mapa nung ano tali akangshir pa aser par kibong ajungai taküm piyong Pasa tenzüktsü tenangzükba nung Ao Baptist Arogo Mungdang (ABAM) ajanga Deobar nü EDABA nung ordain sütsüogo aser tang nungi pa dang Rev.C.Moayanger Jamir ta ajatsü ta sangdongogo.
Rev.C.Moayanger ya Akhoya nunger aser pa tebu asür Chubamerena Akhoya arogo nung sannüker ka liasü. Pa 1998 küm nungi EDABA nung Youth aser Christian Education Director repa inyaka liasü aser küm ishika arogoi yaria tazüngi orr arur külen ano 2010-2011 küma arogo secretary mapa repa inyak liasü. Iba sülen Youth Director teinyakdak nung EDABA nungsa 2014 küm nungi Associate pastor mapa inyaker.
Tanü pa ordain asüba sentong nung ABAM Ordination Committee nungi Committee chairman, Rev.Toshi Longchar den Rev.N.Tzüdir, Rev.C..Allem, Rev. Yabang aser Rev.Dr.Lima nungertem liasü.
Rev.Maoyanger Jamir kinungtsü Aienla Longchari tena nem jabaso tajung ana moaja lir.