CAA ajanga India nunger senso magientsü: Amit Shah

Jabalpur (Madhya Pradesh), Aenjeti/January 12 (Agencies): Amongnü Union Home Minister, Amit Shah-i, reshikangshi tia nung alir Pakistan nunger refugees shia nem India senso magütsü tashi sorkar animesüngzüktsü, ta metetdaktsü.
Tanü Madhya Pradesh kübok Jabalpur nung Citizenship (Amendment) Act (CAA) pusemba sentong ka nung jembidang Shah-i, “Congress nisungtemi anga liang, nenoki akokba tashi CAA anema nokdaktsü akok, ajisüaka reshikangshi tia nung alir Pakistan nunger refugees shia nem India senso magütsü tashi sorkar animesüngzüktsü,” ta ashi.
“Item nisung ajak nem senso agütsüba sülen ang onok anisüngzüktsü. Ibaji inyaktsü atema shingaia onok menokdangtettsü,” ta paisa shisem.
“India nung asenok temeden aliba ama Pakistan nungi Hindu nunger, Sikh, Buddhist aser Khristan refugee tema kasa temeden lir,” ta pai ashi.
BJP Tir, Amit Shah-isa ita pezü tsüngda Ayodhya nung Ram tekülem ki yanglutsü, ta metetdaktsü.
Shah-i Congress lenir, Rahul Gandhi aser West Bengal Chief Minister, Mamata Banerjee na danga, Citizenship Amendment Act (CAA) kübok koba ozüng ajanga India nunger dang nungi senso agientsü shia lir?, ta asüngdang.
Congress party aija pai, “Linük ana küma lemsaba mapang nung Congress party-i tamangba yimsü nung ajemdaker linük lemsa,” ta ashi.
“East aser West Pakistan naprongla nungi Hindu nunger, Sikhs, Parsis, Jain-i yagi (India) arunüa liasü, ajisüaka azütokshi aliba ajanga maru. Iba mapang nung linük lenirtemi parnok kodanga arudir parnok nem senso agütsütsü ta ashi,” ta paisa metetdaktsü.
Yaküm December ita nung Parliament House anaprong nung CAB agizükba sülen iba ya Act ka aküm.
Citizenship (Amendment) Act ya ajanga reshikangshia tia ajanga December 31, 2014 anogo tashi nung Pakistan, Afghanistan aser Bangladesh nungi arua India nung alir Hindu nunger, Sikhs, Jains, Parsis, Buddhists aser Khristantem nem India senso agütsütsü.