CAA aser NRC anema opposi-tion party tem senden amen

New Delhi, January 13 (Agencies): Tang linük tesem ajungalen Citizenship Amendment Act (CAA) aser National Register of Citizens (NRC) anema longkak aitba dak sendakba nung Hombarnü New Delhi nung Congress Tir, Sonia Gandhi-i ayongzüka opposition party tem senden ka menogo.
Ato kilonser, Narendra Modi aser Union Home Minister, Amit Shah na aija Sonia Gandhi-i, tenati linük nüburtem dang yazü jembir, ta ashi.
“Hopta ishika tejaklen ang tenati (Modi-Shah) agütsüba sangdong meputeper,” ta lai ashi.
“Modi-Shah sorkari yimsü mesüteter aser nüburtem nem security magütsüteter. NRC ya Assam nung tebilemba ama matalok,” ta lai ashi.
“Sorkari tim mesüi yimsüsür, tesempa proker aser tamangba yimsü nung ajemdaker asen nübur tsüngda telemsa adokdaktsütsü meranger. Linük temzüng ilatsür aser tim mesüi ketdangsür,” ta laisa ashi.
University balala nung mepetmesü adokba dak sendakba nung lai, “Talisa kaketshirtem aser lanurtem anema inyaker. Linük tesem balala nung, talisa Uttar Pradesh nung nütsüng aika amokmerener aser amaker,” ta ashi.
“BHU, Allahabad University aser AMU densema linük tesem balala nung temaba kaket rejutem nung mepetmesü adokba sülen kobi melii BJP-i nungita JNU nunga atalokbaji nüburtemi süngmanga repranger,” ta laisa ashi.
Tang India nung rongsenkettsüng dak sendakba mapatem chireper aser rongsenkettsüng mainer saka iba dak sendakba nung Ato kilonser aser home minister nati telangzütsü maka, ta lai ashi.
Iba senden nung NCP tongti, Sharad Pawar, LJD tongti Sharad Yadav, Left lenirtem- Sitaram Yechury aser D Raja, Congress lenirtem- Rahul Gandhi, Ghulam Nabi Azad, Ahmed Patel aser taoba Ato kilonser, Manmohan Singh nunger aden. Iba senden nung BSP, AAP aser TMC bo maden.