CAA ya India nunger, talisa Northeast anema lir: Naga Hoho

Kohima, Luchii/December 19 (TYO): 2016 küm Parliament nung Citizenship Amendment Bill benokba mapang nungi Naga Hoho-i iba Bill anema ola adoka aruogo, ta Naga Hoho General Secretary, K. Elu Ndang-i sangdong ka ajanga metetdaktsü.
“State balala nung lokti tentettem aser sorkartemi ‘Citizenship Amendment Act 2019’ (CAA) anema nokdakbaji Naga Hoho-i pusemer. Naga Hoho-i iba Act sashia aitsür, kechiyong iba India nunger, talisa Northeast aser Naga nunger taginüba anema lir,” ta kasa sangdong nung shia lir.
“Naga nungeri iba Bill anema nokdakaka Naga nunger MP asemi tangatetba agi anünga iba Bill pusema vote agütsübaji Naga Hoho-i aitsür,” ta sangdong nung shia lir.
Citizenship Amendment Act (CAA) ya mapa küma inyakra iba ya ajanga ozüng alema arur bendangertem nem tashi agüja Naga nunger nütsüng den kasa akümtsü, aser iba ya ajanga senso fundamental temedentem alema inyaktsü. Iba Act ya secular anema lir, bendanga inyakba, linük temzüng alema aser northeast nung aliba lispopurtem anema lir,” ta sangdong nung shia lir.
“Iba ya shisabulutsü onük ka lir, kechiyong kodang ozüng alema arur bendangertem nem senso agütsüdir Centre-i ILP aliba state tem nung iba Act madentsü, ta sangdongaka Inner Line Pass (ILP) ajanga Naga nunger mekümzüktettsü,” ta Naga Hoho-isa metetdaktsü.