CAB agizüktsü aser linük ajungalen NRC mapa tenzüktsü

Kolkata, April 22 (Agencies): BJP-i linük ajungalen National Register of Citizens (NRC) mapa tenzüktsü aser refugee ajak nem senso agütsütsü ta Hombarnü Bharatiya Janata Party (BJP) president Amit Shah-i ashi.
“Ozüng alema arurtem dak alaka refugee temibo shisabulua mebilemtsüla. Mezüng onoki Citizenship (Amendment) Bill, 2016 yanglutsü aser iba sülen refugee ajak nem senso agütsü. Ibaji ser külen NRC mapa tenzüktsü. NRC ji Bengal atema dang masü saka linük ajunga atema asütsü” ta West Bengal nung Amit Shah-i ashi.
“Bengal nung Hindu refugee temi khuret kecha majurutsü. Mezüng onoki Citizenship Bill yanglutsü aser NRC tenzüktsü. Anungji, ozüng alema arurtemi shisabuluba dak alaka refugee temibo shisabulua mebilemtsüla” ta pai metetdaktsü.
Media-i NRC mapa atema tetsübu aser terata agientsü atema tongti shilem agitsüla, ta paisa shisem.
Rajya Sabha nung Bengal Chief Minister Mamata Banerjee’er party Trinamool Congress dena tanga teloktemi ashishitepba ajanga Citizenship Bill mebenoktet. Saka 2019 elections sülen Rajya Sabha nung nübo melenshitsü aser BJP-i khuret kecha majurutsü, ta paisa ashi.