CAB anema INPT puri lenmang mokdanga ayutsü

Agartala, Yimpoksüi/November 21 (Agencies): Citizenship (Amendment) Bill (CAB) anema rail aser national highway mokdanga ayutsü ta Indigenous Nationalist Party of Tripura (INPT) puri metetdaktsüogo.
INPT general secretary Jagadish Debbarma-i, parnoki CAB anema December 5 nü train senzüba lenmang aser national highway mokdanga ayutsü, ta shiogo.
INPT ya Tripura nung regional aser tribal based party ka lir aser parnoki taoba küm nungi CAB anema longkak aita arudar.
Jagadish Debbarma-isa, taoba küma parnoki CAB anema longkak aitogo, ta ashi.
Pai ashiba agi, Northeast aser talisa Tripura nung ozüng alema bendanger senoka aitba tebilemtsü tulu lir.
India lemdangba sülen Bangladesh nungi nisung lakh aika Tripura-i senoka aitogo, aser maneni state-i bendangertemi ozüng alema arudar, ta paisa ashi.
Jagadish Debbarma-i ashiba agi, lisopurtem pei lima nung nütsüng yongsük tajemba kümogo.
CAB koba tang sorkari parliament nung benoka agizüktsü meranger, iba ajanga state nung tanaben timtem adokdaktsütsü, ta Debbarma-i ashi.
Maneni CAB ya benokra lisopurtem ano tajemba kümdaktsütsü, ta pai ashi.
BJP puri mapa tali adokdaktsütsü nangzük saka mapa adokdaktsütsü merangtsü melena parnoki CAB benoktsü dang jangrar, ta Jagadish-i ashi.