CAB anema lungkak aitba ajanga Assam CM tayimtsü anendak kazü; Assam ajungalen lungkak aitba manener

Bodbarnü Guwahati nung kaketshirtemi CAB anema lungkak aitba angur.

Guwahati, December 11 (Agencies): Mongulbarnü Assam nung nisungtemi Citizenship (Amendment) Bill, 2019 anema lungkak aitba ajanga Chief Minister Sarbananda Sonowal Lokpriya Gopinath Bordoloi International Airport, Borjhar nung anenzüktsüsa aküm.
Sonowal ya Tezpur nungi Guwahati tashi tayimtsü nung aru saka Guwahati nung nisungtemi kanga sashia lungkak aitba ajanga pa airport nungi kimai madoktet kazü. Pa VIP lounge nung liasü, ta osang ajanga ashi.
Anogo ishika tejakdang All Assam Students’ Union (AASU) züngsemtemi Sonowal anema lungkak ait.
December 2 nü AASU züngsemtemi Dibrugarh nung Sonowal’er kidang lungkak ait aser tatem nung sepaitemi parnok senshidakja liasü.
BJP-i aniba Centre sorkar tetuyuba sülen Sonowal-i anidaker. Pai CM menden kümzüktsü mechi nung aser tashi angutsü atema CAB anema ola madoker, ta AASU züngsemtemi aitsü.
Guwahati aser Kaliabor nunga nisungtemi pa dak wako tanak ayiplokja liasü.
Bodbarnü Assam Secretariat nung mapa inyakertemia CAB anema lungkak aitba nung shilem agi ta osang ajanga ashi.
Bodbarnü Kamrup (M) district administration-i Guwahati nung curfew alitsü tetuyuba agütsüogo.
Tanü CAB anema lungkak aitertemi gari 5 shi ka rongdoktsüba sülen iba tetuyuba agütsü.
Curfew ji Bodbar nikongtsütsü 6:15 ako nungi Brihostibar anepdang 6:15 ako tashi alitsü.
Tanü Guwahati nung nisung aika adenshia lungkak ait aser parnoki Assam Secretariat kima nung adenshir “Joi Ai Asom”, “BJP Murdabad” yimyimtem ayim.
Ano, Dispur nunga kaketshirtemi tyre rongdok.
Police-i lungkak aitertem senshidaktsütsü atema süng agi züka meinshitsü merang, tzü khaloktsü aser tenük amdaktsüba bomb amshi saka iba ajanga tensa mazüoktet.
Darrang district nunga AASU züngsemtemi tanü NH 15 mokdanger lungkak ait.
Lungkak aitertemi Mangaldai MP Dilip Saikia aser Mangaldai MLA Gurujyoti Das na na mesüka yanglur rongdok.
MP Dilip Saikia-i CAB pusema jembiba aitsür aser pai tarutsü nung Assamese nunger anema inyakra public-i tuluba lungkak aittsü, ta Darrang AASU lennirtem Arupjyoti Kalita aser Khanindra Rajbongshi-i metetdaktsü.
Assam kübok Jorhat nunga tanü agi anogo asemnübuba nübortemi CAB anema lungkak aitogo.
Tanep nungi tanü nikongtsütsü tashi nisungtemi kanga dang longsoa lungkak ait.
Jorhat district-i administration Arrla 144 CrPC aser Arrla 188 IPC kübok tenokdangba balala agütsüogo.