CAB anema noktakba ajanga Assam lemdangtsü: Pradip Roy

Hokolbarnü Guwahati nung KMSS Advisor Akhil Gogoi-i anir nisungtemi Citizenship Amendment Bill 2016 anema lungkak aitdang agiba noksa ka angur. (Guwahati, November 22)

Silchar, November 22 (Agencies): Citizenship (Amendment) Bill (CAB) anema maneni lungkak aitra Assam ya pungu küma lemdangtsü, ta Pradip Dutta Roy-i ashi.
Dutta Roy ya All Cachar Karimganj Hailakandi Students Association (ACKHSA) founder president lir aser pai ashiba agi “telok balalai lungkak aitba ya manenra, Assam nung yimten aser ali balala bendangtsü.”
CAB ya taküm December ita tetenzüklen parliament nung benoktsü ama bilemer.
All Assam Students’ Union (AASU) aser Krishak Mukti Sangram Samiti (KMSS) teloktemi Assam nung CAB anema lungkak aitba Dutta Roy-i aitsü.
“AASU aser Akhil Gogoi’er KMSS teloktemi kanga meranga CAB anema noktakba ajanga Assam ya shilem pungu küma lemdangtsü” ta pai ashi.
Taoba mapang Roy-i Congress aser BJP teloktem nung züngsema inyakogo aser pai ashiba agi “AASU aser KMSS teloktemi CAB anema noktakba manenra Barak Valley ya Assam nungi balaka razüka aotsü.”
“AASU aser KMSS-i Assam nung nübortem lemdangtsü meranger” ta paisa shisem.
Barak Valley ya Assam nung balaka razüka ora, Bodo, Karbi aser Koch Rajbongshi nungertema balaka aotsü, ta paisa metetdaktsü.
ACKHSA-i Barak Valley ya Union Territory ka kümdakjang ta takhangba agüja mapa inyak saka Dutta Roy-i Congress nung adenba sülen iba onük kangabo mejembir.
Bengali nunger teimba ser aliba Barak Valley-i CAB pusemer kechiyong iba tesem nung Bangladesh nungi aruba Hindu nunger aika lir.
“Komar ka asüyonga, CAB ya December ita tetenzüklen parliament nung benoktsü aser shingaia iba bill menokdangtettsü” ta Roy-isa ashi.