CAB magizükba ajanga BJP-i aniba NEDA loksatsü akok

Guwahati, January 29 (Agencies): BJP-i aniba North East Democratic Alliance (NEDA) tenteter küm asem majungdang Citizenship (Amendment) Bill, 2016 ajanga tetsükdaktsü ka ajurua lir.
Northeast state tenet nung political party 11 shi kati Mongulbar nü CAB anema senden ka menogo aser tadenertem rongnung NEDA nung züngsema alirtema dena liasü.
Assam Assembly election nung BJP-i takok anguba sülen 2016 küm NEDA ya tentet. Iba ya non-Congress forum ka lir aser NE nungi regional party tem aika aden. Iba ajanga BJP tashi taitba aküm aser NE state ajak nungi Congress sorkartem atsüngdok.
Tanü senden nung adenba NEDA teloktemji- National Peoples’ Party (NPP), Mizo National Front (MNF), Asom Gana Parishad (AGP), Naga Peoples’ Front (NPF), Nationalist Democratic Progressive Party (NDPP), United Democratic Party (UDP), Indigenous People’s Front of Tripura (IPFT), People’s Democratic Party (PDP), KHNAM, Hill State Peoples Democratic Party (HSPDP) aser Janata Dal (United) liasü.
“Onoki CAB anema telemtetba takang ka tanü agiogo. Iba Bill ya mapa küma inyak nungbo northeast nunger asoshi lendong tulu keta lir. Anungji, onok ajaki Bill magizüktsü lemtet” ta Mizoram Chief Minister Zoramthanga-i osangbener dang ashi.
“Onoki Prime Minister aser India President dang Bill meyipa agiang ta ashitsü atema teshimtet telok ka shimtsü lemtet. Northeast nungertemi Citizenship (Amendment) Bill 2016 magizükba India sorkari angatettsü imlar” ta tanü senden amenba nung convener aser Meghalaya Chief Minister Conrad Sangma-ia ashi.