Cabinet-i 7th Pay Commission agizükogo; Itasen shilem 23.5 tutsütsü

New Delhi, June 29 (Agencies): Sorkar mapa inyaker aser pensioner crore 1 dak tema atema osang tajung kaji- Bodhbarnü Cabinet-i 7th Pay Commission mapa küma inyaktsü atema agizükogo, iba nung ya sorkar itasen shilem 23.5 tutsütsü densema lir.
Ato kilonser, Narendra Modi-i anir Cabinet senden mena tembangba sülen Union Finance Minister, Arun Jaitley-i twitter ajanga, “Centre sorkar ketdangsertem, mapa inyaker aser pensioner tem nem tenüngsang agütsür; otsüsütsüsa 7 buba CPC (Central Pay Commission) agizükba sülen parnok itasen aser & allowances tutsür,” ta metetdaktsü.
Ajisüaka iba nung ya sorkar mapa inyaker lakh 50 den pensioner lakh 58 indang itasen aser allowance densema ali asü mali’ar tang tashi nungbo osang mejangjar.
January 1, 2016 nungi benokbatem mapa küma inyaktsü Cabinet-i agizükogo, ta sorkar ketdangser kati ashi.
Pay panel-i yaküm November ita nung junior level nung basic pay shilem 14.27 atutsü benoka liasü. Tamalen 6th Pay Commission-i itasen shilem 20 atutsü benoka liasü, ajisüaka 2008 küm ibaji mapa küma benokdang sorkari anasü agi tali tuja liasü.
Itasen, allowance aser pension shilem 23.55 tutsüba ajanga sen lakh crore 1.02 khuret taliba bendenloktsü mesüra senpong nungi GDP shilem 0.7 jungnüa asütsü.
Sorkar mapa inyaktsü tenzükertem indang tetenzükba itasen sen 7,000 nungi sen 18,000 kümdaktsütsü benoka liasü aser itasen timtiba sen 90,000 nungi sen lakh 2.5 kümtsütsü renemogo.
Secretary-temi tentetba ludenisa sorkar mapa mezüngsüa inyaktsü tenzüker indang tetenzükba itasen tajemba sen 23,500 aser timtiba itasen sen lakh 3.25 kümtsütsü.