Cabinet-i CAB agizükba sülen Lok Sabha nung benoktsü

Arunachal, Nagaland, Mizoram aser Sixth Schedule kübok tesemtem madentsü

New Delhi, December 4 (Agencies): Bodbarnü Union Cabinet-i Citizenship Amendment Bill (CAB) agizükogo aser iba nung Arunachal Pradesh, Nagaland aser Mizoram nung inner line permit aliba tesemtem aser North East nung Sixth Schedule kübok aliba tesemtem madener.
Iba tetezüji CAB kübok adenertem India senso akümtsü saka parnok Arunachal, Nagaland aser Mizoram nung melitettsü. ILP aliba state tem nung kasa tenokdangbaji lateta lir.
Maneni, Assam, Meghalaya aser Tripura kübok Sixth Schedule areas nunga kasa ozüngi benshitsü.
“Constitution indang Sixth Schedule nung lateta aliba ama Assam, Meghalaya aser Tripura aser Bengal Eastern Frontier Regulation, 1873 kübok inner line agüja aliba tesemtem nung iba arrla nung aliba kecha mebenshitsü” ta Bill nung shia lir.
“December 31, 2014 nung mesüra jakdang Afghanistan, Bangladesh mesüra Pakistan linüktem nungi India-i aruba Hindu, Sikh, Jain mesüra Christian tem, iba Act ajanga ozüng alema arurtem ta mezüngoktsü. Nisungtemji India Act, 1920 mesüra Foreigners Act, 1946 nung lateta aliba nung ajemdaker Centre sorkari temelaba agütsürtem asütsü” ta Bill nungsa zülua lir.
CAB nung cut-off date ji December 31, 2014 asütsü ta lateta lir.
Iba draft bill nung tanga onük ka benoksema alibaji Overseas Citizen of India (OCI) card holder atema lir.
2016 indang bill yanglushiba sülen OCI card holder kati senso akümtsü atema pa/lai ozüng alema inyaka ali asü mali ta angadangtsü aser iba sülen jiang senso agütsütsü, ta CAB nungsa shia lir.
Home Minister Amit Shah-i Northeast state tem nungi chief minister tem aser civil society teloktem den ajurutepa sendentem amenba sülen ang Bodbarnü cabinet tsüngdang final draft benoka agizük.
CAB ya Hombarnü Lok Sabha nung benoktsü imlar.
Defence minister Rajnath Singh-i BJP MP tem dang CAB agizüktsüba ya Jammu & Kashmir nung Arrla 370 agientsü nüngdakba den kasa lir ta metetdaktsü.
“Taruba hopta home minister Amit Shah-i Parliament nung CAB benokdang MP ajak alitsüla aser MP shingaia senden nung madenba atema tatemtsü magütsütsüla” ta Rajnath-isa ashi.
“BJP-i linük nung alirtem ajungtsü atema teti mapa inyaker aser CAB anema noktaka, iba bill ya kechi südir süaka agizüktsü” ta paisa ashi.