Cabinet-i linük nung AIIMS 20 lapoktsü lemtet

New Delhi, Monupii (May) 2 (Agencies): Rasemnü (Bodbar) Prime Minister Narendra Modi menden ser amenba Union Cabinet senden nung All India Institute of Medical Sciences (AIIMS) 20 lapoktsü sentong agizük. AIIMS 20 nungi 6 bo lapoka lir.
Cabinet-isa medical college 73 jenjang ajungkettsü telemtetba agi.
Iba telemtetba ya Pradhan Mantri Swasthya Suraksha Yojana (PMSSY) nung shilem ka lir aser iba scheme ya 2020 tashi mapang atsülangogo. Iba scheme atema sen crore 14,832 lemzükja lir.
Tanü Cabinet senden amenba sülen Union Minister Ravi Shankar Prasad-i iba osang metetdaktsü.
“PMSSY kübok onoki linük nung AIIMS 20 lapoktsü, koba nungi trokbo lapoka lir. Maneni medical college 73 jenjang ajungkettsü aser iba ya otsüsütsü aketba telemtetba ka lir” ta Union Law and Information Technology Minister-i ashi.
PMSSY küm ana atsülangtsü atema telemtetbaji linük nung healthcare professionals aser facilities nung metokmeperi alibatem reprangshimtsü atema agiba lir.
“AIIMS tasentem lapokba ajanga health education aser training melenshiba dang masü saka healthcare professionals meperiba khuret koktettsü. State balala nung AIIMS lapokba ajanga AIIMS shia nung nisung 3,000 shi mapa angutsü” ta sorkar sangdong ka nung metetdaktsü.
AIIMS tasen yangluba nung sen endokba ajakji Centre sorkari agütsütsü aser maneni parnoki dang operations aser maintenance reprangtsü.
Ano, medical college tem jenjang ajungketbaji super specialty blocks, trauma centres aser tangatem yanglulokba ajanga health infrastructure tajungba kümdaktsütsü atema lir, ta sangdong nungsa shia lir.
Medical osettsüset aliba aser tanga facility nung sen endokbaji Centre aser state sorkartem tsüngda lemsatsü.
“PMSSY ya Atal Bihari Vajpayee’er sorkar mapang tenzükba lir. Jila nungi pilar aliba tesemtem nung healthcare tajung agütsütsü nükjidong nung iba scheme tenzük. AIIMS 6 lapoktsü indang jembia arur saka taruba küm 10 tsüngda kechi atalokdir repranga atadi” ta Prasad-isa metetdaktsü.