Cabinet-i YAA dang Golden Jubilee sentong thinentsü mepishir

Dimapur, January 5 (TYO) : January 5, 2016 nikongtsütsü Chief minister indang residential office nung rongdak cabinet senden ka ayongzüka agidang, Yimchungrü Akheru Arihako (YAA) Golden Jubilee benjung thinena atatsü mepishitsü atema telemtetba agi.
Cabinet Secretary, R.B. Thong-i sangdong ka nung YAA dang Hon Jubilee mung thinentsü aser YAA o YTC-i mapang tatakzük melii mokdangba sentong ayongzükba agientsü atema mepishia metetdaktsü.
Mongulbar nikongtsütsü Cabinet senden nung Shamator nung YAA Hon Jubilee mung dak sendakba nung ashishitep ken o adokba indang onük benoka jembitep.
Iba senden nung Minister 5 dang liasü aser iba jagi parnoki December 30, 2015 nü Cabinet telemtetba meyipa reprangshitsü tashi maliasü, kechiyong ibaji inyaktsü atema Minister 7 bosa alitsüla, ta Cabinet Secretary R.B. Thong aser Minister Kiyanilie Peseyie nati külem sangdong ka nung metetdaktsü.
Shamator nung tensa dang meraksara, sentong ayonga agiba atema sorkari kecha nungnunga mali. Anungji Sorkari iba onük bentettsü aser tangatettep kati arutsü atema mapa inyaktsü atema YAA-i iba benjungmung anogo melenshitsü aser mokdangba sentong agientsü mepishir, ta R.B. Thong aser Kiyanilie Peseyie natisa sangdong nung shia lir.
YAA-i dang mulungra, iba benjung thinentsüsa akümba ajanga senotsü akoksaba ajak State sorkari menoktsü mulunga lir aser Chief Minister aien nungi meyipa aruba sülen Cabinet-i iba onük jembitsü, ta tenati metetdaktsü.

You must be logged in to post a comment Login