Cabinet luden-ANATG 2015 telemtetba tajung ka dangi marü; Tanü nungi tenzüka Adhoc tesayurtemi lumia longkak aittsü

Kohima, Aami/June 28 (TYO): Aami 28, 2018 anepdang Kohima nung PWD Minister, Tongpang Ozukum leniba nung Nagaland Cabinet Committee aser All Nagaland Adhoc Teachers Group (ANATG)-2015 batch na tsüngda senden ka mena service regularization atema jembi, ajisüaka telemtetba tajung ka magiteti senden tembang.
ANATG-2015 batch otongdar, Bendang Ozukum-i, minister-i jaokba ama office ketdangpur aser otongdartem züngsem 11 team iba senden nung aden, ta metetdaktsü. Iba senden nung School Education Advisor, K T Sukhalu aser Principal Secretary, Menukhol John nata densema liasü.
Senden nung sorkari tentetba committee-i service regularization onük latettsü atema ano mapang meshisem aser Department-i Court nung file asütsü aliba Interlocutory Application dak sendakba nung department-i court nem adhoc teachers 2015 batch indang oshidang magütsüdaktsünü.
Bendang Ozukum-isa, tanü agi anogo 9 nübuba longkak aiter, saka tang ano sorkari mapang meshibajibo kanga menor, ta metetdaktsü.
“Sorkar aser department nati onok tebilemtsüji junga meteta lir, kechiyong temepishiba shidi aika den külemi aiben mapang atakzüka agutsüogo, iba denji külemi onok tsüngda senden-a aika menogo, ajisüaka ano mapang meshisembajibo kanga menor,” ta pai ashi.
Aami/June 21, 2018 nü osangbenertem lia Principal Secretary aser department ketdangsertem den senden amenba dak sendakba nung Bendang Ozukum-i, “Iba anogo nung Additional Advocate General-i, contract appointments anema court nung file asüba writ petition ji tan hopta angadangtsü ta nangzük; joko iba hopta tembanger ajisüaka court nung tang tashi iba ken oji mangadang, iba tetezü sorkari item mapang ajak nung adhoc tesayurtem dang yazü jembia arur,” ta ashi.
ANATG otongdarisa, “Sorkar aser department nati zübazülemba ajanga state tesem balala nungi adhoc tesayur 1166 adenshia joko maremzükteter, anungji asüng nungi tenzüka Directorate of School Education kima mapang telatet makai lumia longkak aittsü atema tanü telemtetba agiogo,” ta metetdaktsü. “Sorkari onoki akhangba service regularization mataloktsü tashi state nung district shia nungi nisung 50-i anogo shia lumia longkak aittsü,” ta paisa metetdaktsü.