Cabinet senden nung onük aika lemtet

Dimapur, Chiteni (July) 4 (TYO): Chiteni (July) 4, 2018 nü Cabinet senden amendang Draft Nagaland Water Policy, 2016 benoka olemtepba sülen agizük.
Senden nungsa telungpur anema mapa inyakdang taküm samaba Central Armed Police Forces/Army Personnel/Assam Rifles/Nagaland Police kibong nem sen teyari agütsüba ajungkettsü lemtet
Cabinet-i Study Leave agir higher qualification anguba sorkar mapa inyakertem nem teyari agütsüba meyipa reprangshi. Aami (June) 17, 2014 nü P&AR Department-i sangdong agütsüba kübok medical doctor tem medendaktsütsü aser higher qualification aginüba medical doctors nem teyari agütsütsü atema lemtet.
Cabinet-isa Department ajak nung mapa balala nung nübo shimokba onük benoka lemtep aser Chief Secretary dang sanctioned posts melii nisung shimba noktangtsü atema tetuyuba agüjang ta ashi.
Iba tetuyuba sülen manidakba ketdangsertem dak ozüng agi merenshitsü ta Cabinet-isa lemtet.
State sorkar indang recruitment policy onük jembidang Cabinet-i P&AR Department dang Department ajak nung Grade-C aser Grade-D posts combined recruitment külemi agasütsü aser Cabinet-i telemtetba agitsü atema abentsü metetdaktsü.
P&AR Department dangsa taoba mapang District ajak nung Grade-D posts nung indigenous inhabitants nem dang agütsütsü ta agütsüba maneni agütsüshitsü metetdaktsü.
Department ajaki item mapa ajak meyipa reprangshitsü aser P&AR Department-i ashiba ama inyaktsü aser Cabinet dangi telemtetba ka agitsü atema abentsü metetdakjang ta Cabinet-isa ashi.
Nagaland nung Indigenous Inhabitant Certificate agütsüba dak sendakba nung Cabinet-i Home Department dang A.D.C Dimapur-i sangdong agütsüba atema jangjashitsütsü tetuyuba agütsü.
Nagaland state nung indigenous inhabitant ka ta asüba telatetji 28-04-1977 nü sangdong agütsüba nung aliba ama asütsüla, ta Cabinet-isa metetdaktsü.
Cabinet-isa Home Department dang Inner Line Permit (ILP) mapa inyaktsü atema tebilemba ka abentsü atema tetuyuba agütsü.