Cabinet ulushiba agi kecha masutsü, kechiyong PM-i tashi ajak amshir:Cong

New Delhi, September 01 (Agencies): Hokolbarnü Congress-i, Union cabinet ulushiba mesüra melenshiba ajanga temelenshi kecha malitsü, kechiyong Ato kilonseri, Narendra Modi-i tashi ajak amshir; pai sorkar Cabinet inyakyim raksatsüogo, ta aitsü.
New Delhi nung osangbenertem den jembidang party otongdar, Anand Sharma-i, “Cabinet ulushitsüji Ato kilonseri melungtetba lir. Pa dak sempet mali. Pai kar shimtsü akok mesüra kar anentsütsü akok, aser portfolio melenteptsütsü akok, ajisüaka iba jagi temelenshi kecha malitsü. Kechyiong Ato kilonseri pa kijai tashi amshir,” ta metetdaktsü.
“Sorkar nung Cabinet tenteta lir, ajisüaka iba jagi mapa inyaker asü ? Küm asem tashi tongtibang ministry tem nung Cabinet Ministers mali; iba ama ya kodanga matalokdang,” ta Congress otongdarisa ashi.
“Finance Minister (Arun Jaitley) densema cabinet minister shingaia Cabinet onük mejembir. Paji Cabinet nung Appointments Committee züngsem ka masü. Defence Minister-a züngsem ka masü,” ta paisa ashi.
Congress lenirisa, mapatong ajak Prime Minister’s Office nung ang renemer. “Pa (Modi) Gujarat Chief Minister inyakdanga pai yamajisa inyaka aru. Tang-a pai India nung kasaji inyaker,” ta paisa shisem.