Cabinet ulushiba nung Modi NE sendokogo: Gogoi

Guwahati, July 06 (TYO): Bodhbarnü taoba Assam Chief Minister, Tarun Gogoi-i, Union Cabinet ulushidang Ato kilonser, Narendra Modi-i Northeast India sendokogo, ta aitsü.
Gogoi-i, Rajen Gohain Minister of State shim, ibaji masüdang Chief minister,  Sarbananda Sonowal ya Union minister liasü, ta ashi.
Taoba chief minister Gogoi-i, “1991 küm Congress sorkar nung Northeast India nungi minister pongu liasü. Modi-i Northeast India meimba indang jembiaka NE tesem nungi cabinet minister malibaji tejashitsüka lir. Union cabinet nung cabinet minister aliba ajanga sorkar nung tesem tebilemtsütem benokteter,” ta ashi.
Assam nung BJP sorkar arur ita ka tsüngda osettsüset 127 nung VAT atuba atema Congress-i sorkar aitsü tenzükogo.
BJP indang yimyim “temelenshiji” MLAs aser MPs melenshiba dang lir ta shia Gogoi-i, “Nüngdakba osettsüset nung jenjang kanga tuogo aser sorkarji mapa meinyakba sorkar ka kümogo. Chief Minister Sonowal-i tetuyubatem agütsür saka ketdangsertemi ibaji meinyaker,” ta aitsü.
Congress party-i ashiba agi, July 15 nü ‘bid’ süteptsü aliba, Assam kübok oilfields 12 nung reserve tejangja metettsü atema mongintem dang asüngdangtsü.
Iba mapang Union petroleum & natural gas ministry-i linük tesem ajak nung small oilfields 67 atema ‘open bidding’ asütsü.
Iba dak sentakba nung Gogoi-i, “Assam nung Public sector-i agitsü shilem ka lir. Assam-i kümshia million metric tonnes per annum (MMTPA) 4 shi adokdaktsür. Tang aliba refinery pezü atema asenoki tangalen nungi totzü tazü alizüktsüsa akümer. Oilfield 12 nungji metric tones million 21 lir aser ibaji nija meyong kümdaktsütsü. Assam-i iba reserve ngura asenoki nüngdakba totzü tazü peria adoktsü,” ta ashi.
Paisa ashiba agi, public sector companies OIL aser ONGC-i linük adener bendanglen  small & marginal fields atema bid süa inyaker, ajisüaka Assam nung inyaktsübo memulunger.