Cabinet ulushitsü lia Union minister 8-i BJP Tir Amit Shah ajuru

New Delhi, August 31 (Agencies): Cabinet ulushitsü lia Brihostibarnü Union minister 8-i BJP Tir, Amit Shah ajuruogo.
Minister tem jagi Gujarat election dak sendakba nung BJP tongi, Amit Shah ajuru ta shiaka Union Finance Minsiter, Arun Jaitley-ibo, cabinet ulushitsü aliba dak sendakba nung parnoki Amit ajuru, ta ashi.
Jaitley-isa asayamenua, pa defence minister (pai repsema abenba ministry) mapang talangkabo meinyaktsü, ta ashi.
Defence aser finance ministry dak alia taruba Gujarat assembly election in charge atema Jaitley shima lir. Gujarat eletion atema Jaitley den yariteptsü shima alirtemji- NS Tomar, N Sitharaman, J Singh aser PP Chaudhary nunger lir, aser tanü parnoki Shah ajuru.
Kasa senden nungsa BJP Rajya Sabha MP, Bhupendra Yadav-a dena liasü.
Yadav-i, “Onoki Gujarat election atema asalentong balala nung o lemtep. Tanga onükbo kecha mejembi,” ta ashi.
Union Defence minister, Manohar Parrikar-i menden toktsür Goa chief minister atema tenangzükba agiba sülen taküm March 14 nü Ato kilonser, Narendra Modi-i Union Finance minister, Arun Jaitley nem defence ministry-a repsema inyaktsü atema mapa nunglokja liasü.
2014 general election nung BJP-i takok tulu anguba sülen Jaitley nem Defence ministry-a repsema agütsü, iba sülen Parrikar defence minister shima liasü.
BJP lenir, Anil Madhav Dave asüba ajanga taküm May ita nung science & technology minister, Harsh Vardhan nem environment & forest ministry repsema inyaktsü nungloktsü. Iba denji kasa taküm July ita nung BJP lenir, Venkaiah Naidu Tir candidate shimba ajanga textiles minister, Smriti Irani nem information & broadcasting ministry repsema inyaktsü nunglokja liasü. Kobi melii cabinet ulushia item ministry atema minister tem shimtsü.
Ato kilonser, Narendra Modi-i aniba NDA sorkari cabinet ulushiba den külemi NDA nung teloktep party ana- Janata Dal (United) aser All India Anna Dravida Munnetra Kazhagam (AIADMK) na nungia lenir kar cabinet nung anioktsü, ta osang angazüker.