Cachar nung mejangjaba tashidak ka adoka ajak aoksatep

Silchar, April 19 (Agencies): Cachar district kübok Sonai circle nung mejangjaba tashidak ka ajanga keket reju asem nung class agiba mapang taoba anogo ishika tsüngda nung kaketshir 102 dak kongshiogo. Kaketshirtem ya timba tetsür lir.
Swadhinbazar Abid Raja ME school, Swadhinbazar High school aser 478 No. Durbikandi LP school nung taoba ita hopta 3buba nung kaketshir 79 shiranga aitba sülen iba tatalokba mezüng jangja metet, ta osang ka ajanga ashi. Maneni item kaket rejutem nung taoba Hokolbarnü tashi nung kaketshir 23 tashi class agiba mapang shiranga aitba osang agüja liasü.
Mongolbarnü osangbenertem-i kaketshirtem den sensaksemba mapang tetsür kaketshir ka süjia oadok. 478 No. Durbikandi LP school nung tesayur Hasan Ahmed-a Hombarnü temang meshidaki küma süjia oadok, ta kasa osang ajanga metetdaktsü.
“Class tagidak nung kaketshirtem süjia oa liasü, aser iba kasa ya taoba Hokolbarnü nungi tenzüka maneni ataloka arudar. Mongolbarnüa tetsür ka süjia ao. Iba tatalokba ya asadanger ngutetba agi, campus kasa nung aliba kaket reju asem nung ya kaketshirtem parnok 102 dak iba ya atalokogo,” ta Swadhinbazar High school, Headmaster, Joynal Abedin Barbhuiya-i ashi.
Maneni pai ashiba agi, kaketshirtem kar mozüki-i yok aser temene tanüla tamajung aridoktsü asoshi arasenertemi mapa inyakdar. “Hombar anogo kaket reju nung ‘Milad Mahfil’ ka ayongzüka agiogo,” ta Headmaster-isa ashi.
Sonia government mozüki nung doctor kati ashiba agi, ‘mercury’ ajungbena ajungketba ajanga kaketshirtem süjia aoer. Pai kaketshirtem dang tzü peria ajemtsü asoshi ajungshi.
Kaket reju ajanga ashiba agi, parnoki iba osang ketdangsertem nem metetdaktsüogo, saka tang tashi nung medical team kecha meyok. Ketdangsertemi school maneni agia aotsü asoshi tetuyuba agütsü. Kasa mapang nung iba timtem ajanga kaketshirtem school nung madener aika kümdar.