CADC tarutsü CM ket nung lir

Aizwal, Monupii (May) 2 (Agencies): Chakma Autonomous District Council (CADC) shibai yimsü asütsü, ta asüba ken o ya Chief Minister Lal Thanhawla kaboma nung lir, ta opposition Mizo National Front (MNF)-i Sangtennü ashi.
CADC ya Bangladesh aser Myanmar arrtsü nung aliba South-Western Mizoram kübok Chakma nunger tem atema autonomous council ka lir. Iba council ya 1972 küm Constitution, sixth schedule kübok tentet.
CADC nung menden 20 lir aser Rongchii (April) 20 nü election agia liasü, saka party kati danga council kümtettsüsa menden mekoktet. Iba election nung MNF puri menden 8, Congress-i menden 6 aser BJP-i menden 5 ta koktet. Menden ka atema election magi alitsü asoshi Gauhati High Court-i tetuyuba agütsü.
MNF puri ashiba agi, parnoki lenirtemi District Council Affairs Secretary Rodney L Ralte den BJP-Congress ajanga mepetmesü adokdaktsüba aser MNF puri floor test agitsüba atema akhangba dak sendakba nung sensaksemtsü asoshi ajurutepogo.
Election magi tsüngda BJP aser Congress na longjem aser BJP nungi lenir kati executive committee kümtettsü asoshi akhanger.
Opposition MNF puri Angh Lt Gen Nirbhay Sharma den ajurutepogo aser floor nung majority test asütsüba atema khangogo, kechiyong parnoki election nung menden timtiba kokteta lir.
Ralte-i ashiba agi, state sorkari lenmang ana asadangdar aser iba nung kaji MNF puri akhangba ama floor test akatsüba mesera BJP-Congress longjemer tentetba United Legislature Party (ULP) pur nem CADC, executive committee kümtettsüba atema tashi agütsütsübaji lir.
“Ralte-i ashiba agi, department-i lenmang ana benokdangogo aser Chief Minister Lal Thanhawla-i iba ken o dak sendakba anung telemtetba agir Angh nem osang agütsütsü,” ta MNF-i sangdong ka ajanga metetdaktsü.
Secretary-i parnok dang ashiba agi, CADC dak sendakba nung tatembangbuba telemtetba ya Rasemnü agütsütsü akok.
State Sports Minister Zodintluanga-i Rongchii (April) 25 nü ashiba agi, party ana nung local lenirtem election magi tsüngda longjemba ajanga northeast state nung taurba assembly election aser Delhi nung kecha mekongshitsü.
BJP sangdong ka ajanga ashiba agi, party-i CADC election nung Congress den longjemba atema lenirtem nem tepet temerenshi agütsütsü akok. Iba sülen pei party maitsü toktsür Congress nungi züngsem parnok troki ULP nung adentsü asoshi telemtetba agi.
ULP puri BJP nungi Santi Jiban Chakma parnok lenir asütsü shimogo aser Congress nungi Buddha Lila Chakma deputy leader ama shimogo aser pasa Chief Executive Member shimtsü akok.
MNF puri BJP den longjemtsüba atema mulunga liasü saka BJP puri CADC nung temaba menden aginüba ajanga parnok den longjemtsü asoshi memulungi aküm.