Cairo bomb lendong nung police ka pokset

Cario, June 18 (Agencies): Egypt yimtiba, Cairo tezülen aliba Maadi tesem nung lenmang anasa bomb ka apokba lendong nung Egypt police ka asü aser pezü yiru, ta sorkar sangdong ka nung ashi.
“June 18 anepdang 12:45 meta Central Security Forces indang gari ka nung police tanishir kar mener aoba mapang lenmang nung yuja aliba bomb apok,” ta Interior Ministry ajanga Deobarnü sangdong.
“Iba lendong nung First Lieutenant, Ali Abdelkhaliq asü aser oplice tanishir pezü yiru. Item yirur alirtem ya mozüki nung anepaluba mapang lir,” ta kasa osang ajanga ashi.
Iba bomb ya tesem balaka nungi inyaksangshia pokdaktsü aser mezüng bushisüngdangba mapang iba bomb ya mobile phone indang SIM card amshia pokdaktsüba amai bushitet,” ta Interior Ministry nung ketdangser kati ashi.
Iba lendong adalokba tesem nung aliba ki nung alirtem dang asüngdangya südagi aser iba lendong agütsür putettsü meranger, ta kasa osang ajanga-sa ashi.
Iba lendong agütsüba tenüng ya telok katia agia mali.
2013 küm nungi tenzüka Egypt indang Sinai Peninsula nung Islamic State of Iraq & Levant (ISIL) ajanga lendong balala agüja arudagi aser iba mapang mitkar aser police noklang aika taküm samaogo.
ISIL koba dang ISIS ta ajar, item telok ajanga mitkartem aser Coptic Christian nüburtem dak amakba lendong aika ajuruogo aser December nungi tang tashi nung Coptic Christian 100-shi tepsetogo.
Item telok kisüng masü saka Cairo nung telungpur telok aika lir aser item telok ajanga mitkar, obendanger aser sorkar busemer tem dak tenük yoker lendong agüja arur.