Cairo nung cathedral amakba lendong nung nisung 25 asü

Cairo (Egypt), December 11 (Agencies): Deobarnü Egypt nung tongti Coptic Christian cathedral ka bomb amshia amakba lendong nung tajemba agi nisung 25 asü aser nisung 35 yiruogo, ta Egyptian state television ajanga metetdaktsü.
Tesüiba küm ishika tsüngda nütsüng ajema aliba Khristantem amakba rongnung tamajungtibaji iba tatalokba ya asütsü.
Anogo ana tejaklena linük yimtiba Cairo nung bomb pokdakja police trok tepset, aser ibaji Muslim Brotherhood den tesentaktep aliba telok kati inyak, ta ketdangsertem tai tongloktsüogo.
Egypt sorkar osang ka ashiba agi, nisung kati Egypt nung Orthodox Christian church indang tongtiba tenlaki St Mark’s Cathedral chapel nung bomb ka pokdaktsü. Iba tenla kidangsa yimsü lenir, Pope Tawadros II indang office lir.
Ajisüaka tenük kuli alirtemibo, chapel telung nungji tapoktsü oset yutsüba ajanga apok südi ta ashi.
Iba lendong atalokli iba tesem jagi arur Associated Press osangbener kati, “ni azü den aina tejaksatem angu, aser tekülem kima nisung aika jeptepa angu,” ta ashi.
Cathedral nung inyaker, Attiya Mahrous-ia, “Ni tasümang aika angu, parnok timbaka tetsürtem liasü aser tasümangji tekülem kidang aliba menden nung angu,” ta ashi.
Tang tashi nungbo iba lendong atalokdaktsüba atema shingaia tenüng agia mali.
Mitkartemi Muslim Brotherhood nungi linük Tir, Mohammed Morsi atsüngdokba sülen nungi Islamic telungpurtemi aiben amaker. Morsi pusemer aikati pa Tir menden nungi atsüngdokba atema Khristantem nem tai tongloktsür. Iba tatalokba sülen Tenla ki aser Khristantem indang kiojen aika raksaja liasü.
2011 küm Alexendria nung nisung 21 tepsetba densema Islamic telungpurtemi Khristantem aiben maka arur.