Cairo: Rong tsüktepba lendong nung 21 shi asü

Cairo, July 23 (Agencies): Egypt yimtiba, Cairo anüdoklentip tsütsü Nile ayong nung nübur aniba rong ka aser khu abenba rong ka yasüng tsüktepa lendong atalokogo ta police-i tanü Brehostibar nü metetdaktsü.

Nübur 21 shi aniba rong dak khu abenba rongi tsükshia lendong atalokba sülen nisung 21 shi asüba osang tang tashi nung jangjaogo ta parnoki ashi.

Parnokisa ashiba agi, rescue ketdangsertemi nisung 5 tashi ayong nungi aniteta taküm kümzük saka tanep tashi nung nisung 6 shi monguteti bushia liasü.

“Tan lendong nung asür rong nung tila tanura 2 tashi densemba osang jangjaogo,” ta shia, police-i khu abenba rong anishisang aser pa den yaritepsang na pua aliba osang ka Egypt health ministry ketdangser katia metetdaktsü.

Nile ayong nung tan atalokba amala lendong mapang shia ataloker ta pai ashi.

“Egypt nung alir Islam tamangba yimsü amangertemi par temeshi Ramadan ita lumia amongba sülen pelatepa rong nung senzüba ajanga Nile ayong nung tang rong kanga sashia akümba ajanga tan amala lendong ataloktsüsa tensa aiben ajurur,” ta pai metetdaktsü.

Taoba mapang, February 2006 nunga Red Sea nung nübur aniba rong ka meküboka lendong atalokba ajanga rongi anir alir nisung 1000 dak tema asüba osanga bushiteta lir.