Calais nung tentetba migrant jenokdak shibangadoktsü: Hollande

Calais, September 26 (Agencies): France anüdoklentip tsütsülen, Calais jila nung tentetba migrant nisungtem jenokdak taküm, 2016 küm tatemlen shibangadoktsü renemba osang ka France Tir, Francois Hollande-i tanü, Hombar nü metetdaktsüogo.

“Calais jenokdak alir migrant nisungtem kangasa tepetzük tia nung aliba asen ajaki meteta lir. Iba jenokdak ya taküm küm tatemlen tashi nungbo shibangadoktsü renema lir,” ta pai ashi.

“Calais nung jenoka alirtemi Britain nung jenoktsü tejangraba lir, anungji, Calais nung jenoka alirtem taküm jenjang tajungba kümdaktsütsü mapatong nung Britain-i France den yariteptsü ajungshir,” ta Hollande-i sangoktsü.

Calais nung tentetba jenokdak Syria, Iraq aser Afghanistan amala lendong kanga sashia atalokba linüktem toktsür migrant nisung 10,000 dak tema jenoka aliba osang bushiteta lir.

Calais nung jenoka alir migrant nisungtem telok tilala kümdaktsür parnok France tesem balala nung jenoka lidaktsütsü asoshi Hollande-i aniba France sorkari mapatong tenzüktsü sentong renema lir saka Socialist teloki aniba opposition teloki Calais migrant nisungtemji Britain sorkar khuret ta shia, iba mapatongji anemtsü tenzüka lir.

Calais nung jenoka alir migrant-temi Britain-i oa idakji jenoktsü jangrar saka parnoki European Union (EU) temzüng amshiba ajanga ang Britain nung jenoka lidaktsütsü melatsü ta Britain-i metetdakja lir.

Pei talikdak toktsür tesem tanga mesüra bendanglen jenoka alitsü merangertem, immigrants den sentakba mangatettepbaren adokba dak tongtibangsüa ajemdaker, Britain-i brexit ta ajaba EU toktsütsü telemtetba taküm June ita agi aser taruba 2017 küm April ita agitsü ayongba France Tir election nunga iba onükji kanga dang tongtibangsüa benoktsüsa tang tensa ajurua lir.

Britain den tzü arrtsülen, Calais ajangdanga migrant nisungtemi Britain nung jenoktsü merangba maparen nokdangtsü nükjidong nung France aser Britain nati tezüngzüktep ishika agiba osanga jangjaogo.