California convention nung Trump anema lungkak ait

Washington, April 30 (Agencies) : California Republican Convention nung nisung noklang aikati Donald Trump o jembitsü jakdang pa anema lungkak ait meso.
Item lungkak aitertem karbo tekolak nung sü mesür Mexico nunger wako amer liasü. Hokolbarnü parnoki Hyatt Regency, Burlingame city nung gari lenmang ajak nokdang aser ibaji ajanga Republican party nung lenir Donald Trump amenba gari hotel tesülen tesem tawa ka nung anentsüsa akum, ta CNN osang ajanga ashi.
Iba sülen Trump-i tashi anga gari nungi alur ki telungi ai.
“Tesem kati aotsü atema tasaktibaji tanü liasü,” ta convention nung o jembi tenzükdang ashiba mapang Trump-i, “Ni arrtsü ajanga aoer amai bilem,” ta shisem.
Trump iba tesem arua matong tsüngdang lungkak aiter nisung 24 shi-i iba hotel rangben melapokdaktsütsü merangba ajanga police ketdangsertemi hotel kishi alileni nungoka ia item nisungtem senshidaktsü.
Tashiyim agi atsü yonga melapoktettsü atema Hotel kishi karbo telunglen nungi alenbanger liasü.
Lungkak aitertemi tashiyim agi nungoka aiba ngua parnok senshidaktsütsü atema police temi süng agi nokdaktsü tenzük.
Trump arua atongba sülen lungkak aitertemi nokdanga aliba lapoktsü aser takdang telungi aiba lenmangi parnok nunga aru. Iba mapang ano police-i parnok telungi meidaktsüi nokdaka liasü. Parnok lungkak aitertemi “Pa anitetang” ta yimyim ayima liasü.
Nüburtemi linük tesem aika nung joko ita aika Trump nübuyim sentong jangjungtsür, ajisüaka khen danga lendong tulu küma mao. Tanga linük nung lendong atalokba mapang US nung arua jenokertem atema jembiba mapang pai o tali tapong jembiba ajanga nübur aikati pa aitsür.
Costa Mesa, California nung Brihostibar aonung pa nübuyim sentong jangjungba aser tan convention mapang lungkak aitba mapang pa pusemer aser lungkak aitertem tsüngda teka itepa raratepba aika atalok.
Iba lendong mapang tajemba agi police gari ka raksa aser Trump pusemer ka dak tejak nung tsüngoktsüba ajanga azü yima yiru.
Iba mepetmesü adokba dak sentakba nung onoki nisung 20 shi pua bener ogo, ta police-i metetdaktsü.