San Francisco, September 11 (Agencies): United States kübok California state sorkari Honda Motor Co Ltd. telok nem par pasasa jajaba gari yimti yimdong nung senzütsü temelaba agütsüogo.
Honda teloki Google Inc aser Volkswagen AG telok na sülen anidaka, ‘Autonomous Vehicles’ ta ajaba nisungi manshiaka, pasasa lenmang nung jajatetba gari yimti yimdong nung senzütsü temelaba tan angur lir.
Alima nung kanga dang kara ainba technology tasen amshia pasasa jajadaktsüba gari yimti yimdong nung senzütsü temelaba Honda telok nema agütsüba osang ya California Department of Motor Vehicles-ia par website ajanga metetdaktsüogo.
Daimler AG, Mercedes Benz, Tesla Motors Inc, Nissan Motor Co Ltd aser BMW AG nunger densema gari yanglur telok 10 tashi nem iba temelaba ya tanü Hokolbar nü tashi nung agütsüba osang jangjaogo.
Japan nung tentetba Honda teloki par pasasa jajaba gari tendangtsü asoshi California kübok San Francisco yimti northeast tsütsü, Concord nung tendangdak ka tentetba osanga jangjaogo.
US kübok Michigan, Florida aser Nevada nunger sülen anidaka, California state-ia par yimti yimdong nung pasasa jajaba garitem senzüdaktsütsü ozüng lateta lir.
Alima ajunga nung pasasa jajaba gari senzüdaktsütsüsa gari yanglutsü technology-ji 2020 küm tashi nung renemtettsü imlaba olen ka Google telokia metetdaktsüogo.
California-i Honda telok nem par pasasa jajaba gari senzütsü temelaba agütsür added by asungba on
View all posts by asungba →
You must be logged in to post a comment Login